भारत कोरोना : घटदै संक्रमण दर, मृत्यु दर उस्तै

काठमाडौं । दोस्रो लहरको संक्रमणको ‘हटस्पट’ बनेको भारतमा एकसाता यता संक्रमितको दैनिक वृद्धिमा कमी आएको छ ।

भारतमा पछिल्लो २४ घण्टामा २ लाख ६३ हजार ४५ जना नयाँ संक्रमित थपिएका छन । संक्रमितको यो संख्या सोमबारको तुलनामा करिव २० हजारले कम हो ।

कुल संक्रमित संख्याका आधारमा दोस्रो स्थानमा रहेको भारतमा कोरोना संक्रमितको संख्या २ करोड ५२ लाख नाघेको छ ।

नयाँ संक्रमितको संख्या केही घटे पनि पछिल्लो केही दिनयता दैनिक मृतकको संख्या भने रेकर्ड बन्न थालेको छ ।

भारतमा पछिल्लो २४ घण्टामा ४ हजार ३ सय ९२ को मृत्यु भएको छ । यो संख्या हालसम्मकै उच्च हो । योसँगै कोरोना संक्रमणकै कारण भारतमा मृत्यु हुनेको कुल संख्या २ लाख ७७ हजार नाघेको छ ।

संक्रमितमध्ये २ करोड १५ लाख ९० हजार ३ जना निको भइसकेका छन । ३३ लाख ५९ हजार २१६ जना सक्रिय संक्रमित रहेका छन ।