बोल्यो भारत : नेपालमा विकसित राजनीतिक घटनाक्रम नेपालको आन्तरिक मामिला

काठमाडौं । भारतले नेपालमा विकसित पछिल्लो राजनीतिक घटनाक्रम नेपालको आन्तरिक मामिला भएको टिप्पणी गरेको छ ।

प्रधानमन्त्री केपी शर्मा ओलीको सिफारिसमा राष्ट्रपतिले संसद विघटन गरेपछि नेपालको राजनीतिक मामिलामा निरन्तर गतिविधि गर्दैआउने भारतले पहिलो पटक मुख खोलेको हो ।

भारतीय विदेशमन्त्रालयका प्रवक्ता अन्दिम बाग्चीले नेपालमा विकसित पछिल्लो राजनीतिक घटनाक्रमलाई नोटिसमा लिएको बताउँदै यो विषय नेपालको आन्तरिक मामिला भएको बताएका हुन् । बाग्चीले भने, ‘यो नेपालको आन्तरिक मामिला भएकाले उसको आफ्नो घरेलु फ्रेमवर्कभित्र र प्रजातान्त्रिक प्रक्रियाबाट समाधान गर्नुपर्छ ।’

‘एउटा छिमेकी र मित्रका हिसाबले नेपाल र नेपालीको प्रगति, शान्ति, स्थायित्व र विकासमा भारतले गर्दै आएको सहयोगमा भारत प्रतिवद्ध छ’, बाग्चीले भने ।