सुनसरी । सुनसरीको धरानस्थित एक प्रहरी चौकीमा स्थानिय हतियारधारी युवकहरूको एक समूहले आक्रमण गरेका छन् ।
जाहेरी दिन आएका व्यक्तिलाई खोज्दै प्रहरी चौकीमा प्रवेश गरेका ८-९ जनाको समूहले प्रहरीमाथि नै आक्रमण गरेको हो ।
धरान १५ बाझगरस्थित वडा समिति कार्यालयको अगाडि रहेको प्रहरी चौकीमा आक्रमण हो । घटनामा असईसहित पाँचजना प्रहरी घाइते भएको प्रदेश प्रहरी कार्यालय विराटनगरका प्रहरी प्रवक्ता एवम् प्रहरी उपरिक्षक महेन्द्रकुमार श्रेष्ठले जानकारी दिए ।
प्रहरीका अनुसार एउटा समूह उजुरी लेख्न आएको थियो । त्यसको पछि पछि आएको सो ८-९ जनाको समूहले चौकीभित्रै प्रवेश गरी जाहेरीकर्तालाई नै आक्रमण गरेपछि त्यसलाई रोक्न खोज्दा हतियारधारी युवाहरुले प्रहरीमाथि नै आक्रमण गरेको प्रवक्ता श्रेष्ठले बताए ।
आक्रमणबाट प्रहरी चौकीका इन्चार्ज असई सुमन दाहालको हातमा गहिरो चोट लागेको छ । उनको धरानस्थित बीपी कोइराला स्वास्थ्य विज्ञान प्रतिष्ठानमा उपचार भइरहेको प्रवक्ता श्रेष्ठले जानकारी दिए ।
प्रहरीमाथि आक्रमण गर्ने युवाहरुको खोजी कार्यमा प्रहरी परिचालन गरिएको श्रेष्ठले बताए ।
प्रतिक्रिया