नयाँ मन्त्रीहरुको सपथग्रहण बेलुकी ८ बजे

काठमाडौं । प्रधानमन्त्री केपी शर्मा ओलीले आफ्नो मन्त्रिपरिषद् पुनर्गठन गरेका छन् ।

नयाँ मन्त्रीहरुको सपथग्रहण आजै बेलुकी ८ बजे हुने भएको छ । राष्ट्रपति कार्यालयले सपथग्रहणको तयारी सुरु गरिसकेको छ ।

राष्ट्रपतिमार्फत आगामी कात्तिक–मंसिरमा मध्यावधि निर्वाचन घोषणा गराएका ओली कामचलाउ प्रधानमन्त्री भएपनि पूर्णअधिकारप्राप्त हैसियतमा मन्त्रिपरिषद् पुनर्गठन गरेका हुन् ।

ओलीले आफ्नो सत्ता टिकाउन पार्टी नै फुट्ने अवस्था आउँदा पनि सहयोग गरेको जनता समाजवादी पार्टी जसपाको ठाकुर समुहलाई खुशी पार्दै मन्त्रिपरिषद् पुनर्गठन गरेका छन् । यसरी पुनर्गठन गर्दा आफ्नो पार्टीका केही सहकर्मीहरुको भने मन कुँढ्याएका पनि छन् ।

नयाँ मन्त्रिपरिषद्मा जसपाबाट राजेन्द्र महतोको नेतृत्वमा जसपा ठाकुर समुहका १० जनालाई मन्त्री बनाइएको छ । यस्तै, एमालेबाट मन्त्रीबनेका चारजनाबाहेक अन्य सबै जनालाई हटाएर नयाँ अनुहारहरु ल्याइएको छ ।