जनकपुर । पार्टीमा महन्थ ठाकुर पक्ष केन्द्रमा एमालेसँग सत्तासाझेदारी गर्न पुगेपछि प्रदेश २ मा जसपाको उपेन्द्र यादव पक्ष काँग्रेस र माओवादीसँग सत्तासाझेदारी गर्ने प्रयास सुरु गरेको छ ।
पार्टी व्यवहारिक रुपमा विभाजित भैसकेपछि प्रदेशसभामा बहुमतमा रहेको यादव पक्षले ठाकुर पक्षका मन्त्रीलाई बर्खास्त गरी कांग्रेसलाई सत्तामा ल्याउने प्रयास सुरु गरेको हो । जसपा प्रदेशसभा संसदीय दलको हिजो बसेको बैठकले मुख्यमन्त्री लालबाबु राउतलाई दलको नेतामा चयन गरिसकेको छ । मुख्यमन्त्री राउतले हिजै राति ठाकुर पक्षका चार मन्त्रीलाई बर्खास्त गरिसकेका छन् । प्रदेशसभामा रहेका ५५ जनामध्ये यादव पक्षमा ३६ जना सांसदहरु रहेका छन् ।
जसपाले आज सोमबार कांग्रेसका सांसदहरुसँग छलफल गरेको हो । यसअघि अध्यक्ष उपेन्द्र यादवले काग्रेस उपसभापति विमलेन्द्र निधिसँग सत्तासहकार्यको विषयमा छलफल गरिसकेका छन् । सोमबार जसपाका तीन जना मन्त्री र कांग्रेसका तीन जना सांसदबीच सरकारको विषयमा छलफल भएको कांग्रेसका सचेतक उपेन्द्र कुशवाहले बताएका छन् । दुवै पक्ष पुनः साँझ पनि छलफलमा बस्नेगरी उठेका छन् ।
बैठकमा जसपाको तर्फबाट भू मि व्यवस्था, कृषि तथा सहकारी मन्त्री शैलेन्द्र साह, उद्योग, पर्यटन वन तथा वातावरणमन्त्री रामनरेश राय र समाजिक विकासमन्त्री नवलकिशोर साह, सहभागी थिए । यस्तै, कांग्रेसको तर्फबाट सचेतक कुशवाहसहित शिवचन्द्र चौधरी र विरेन्द्र सिंह सहभागी थिए ।
प्रदेशसभा अधिवेशन आजैबाट सुरुहुँदैछ । असार १ गते बजेट ल्याउनैपर्ने संवैधानिक बाध्यता छ । यसका लागि ठाकुर पक्षका सांसदहरुले असहयोग गर्ने निश्चित भएपछि मुख्यमन्त्री राउतले सो पक्षका मन्त्रीलाई हटाएर कांग्रेसलाई सत्तामा ल्याउन चाहेका छन् ।
माओवादीले आफ्ना सांसदलाई कारवाही गरेपछि १०७ बाट १०४ सदस्यमा झरेको प्रदेशसभामा बहुमत पुर्याउनका लागि ५३ जना सांसदको आवश्यकता पर्दछ । ३६ जना सांसदको समर्थन जोगाएका मुख्यमन्त्री राउतका लागि थप १७ जना सांसदको आवश्यकता पर्दछ । कांग्रेससँग १९ जना सांसद छन् । जसपाले माओवादीसँग पनि सहकार्यको प्रस्ताव गरेको छ । माओवादीका भने ८ जना मात्र सांसद रहेका छन् ।
प्रतिक्रिया