पुरानो लयमा फर्कने प्रयासमा बाँके र रुपन्देही, कोरोना अस्पतालहरु खाली हुँदै

नेपालगन्ज । कुनैबेला लुम्बिनी प्रदेशकै कोरोनाको हटस्पट बन्न प्रतिस्पर्धा गरिरहेका बाँके र रुपन्देही बिस्तारै आफ्नो पुरानो लयमा फर्कने प्रयास गरिरहेका छन् । बाँकेका बिगत ३ दिन देखि जिल्ला भित्रका कसैको पनि मृत्यु भएको छैन भने रुपन्देहीमा पनि मृत्युको संख्या १ वा २ मा सिमित भएको छ ।

रुपन्देहीमा पछिल्लो २४ घण्टामा १९ जना नयाँ संक्रमित थपिँदा १ जनाको मृत्यु भएको छ भने बाँकेमा ८ जना संक्रमित थपिँदा मृत्युको संख्या शुन्य रहेको छ । रुपन्देहीमा सक्रिय संक्रमितको संख्या २६८ मा झरेको छ भने बाँकेमा ७४ जना मात्र सक्रिय संक्रमित रहेका छन् ।

पछिल्लो २४ घण्टामा बाँकेमा ९ जनाको डिस्चार्ज भएको छ भने रुपन्देहीमा ५७ जना डिस्चार्ज भएका छन् ।

बाँकेका अस्पतालहरुमा संक्रमितहरुका लागि छुट्याईएका बेडहरु मध्य ८८ प्रतिशत बेडहरु खाली भै सकेका छन् भने रुपन्देहीमा ३८२ बेड संक्रमितहरुका लागि छुट्याईएकोमा आज सम्ममा ७३ जनाको मात्र उपचार चलिरहेको स्वास्थ्य कार्यालय रुपन्देहीका कोरोना फोकलपर्शन केदार साहले बताए ।