काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले प्रधानमन्त्री शेरबहादुर देउवासँग भेट गरेका छन् ।
मंगलबार बिहान एमाले वरिष्ठ नेता माधवकुमार नेपालसँग भेट गरेका अध्यक्ष प्रचण्डले त्यसपछि प्रधानमन्त्री भेट्न बालुवाटार पुगेका थिए ।
सरकारले विश्वासको मत पाइसकेको अवस्थामा अब मन्त्रिपरिषद्लाई पूर्णता दिने विषयमा प्रचण्डले देउवासँग छलफल गरेको बुझिएको छ । प्रधानमन्त्री नियुक्ति भएकै दिनमा देउवाले कांग्रेस र माओवादी केन्द्रका दुई दुई जना गरी चार जना मात्र मन्त्री बनाएका थिए ।
अब बाँकी मन्त्रीहरु समेत छिट्टै नियुक्त गरेर मन्त्रिपरिषद्लाई पूर्णता दिनुपर्ने छ । सरकारमा जनता समाजवादी पार्टी जसपा सामेल हुने निर्णय गरिसकेको छ भने एमालेको नेपाल पक्षले अझै निर्णय गरिसेकेको छैन । २५ सदस्यीय मन्त्रिपरिषद्मा ३ जना राज्यमन्त्रीसहित २४ जना नियुक्ति गर्न मिल्छ ।
प्रचण्डले सरकारको न्यूनतम साझा कार्यक्रम बनाएर गठबन्धन दलहरुबीच विश्वासका आधारमा सरकार संचालन गर्ने विषयमा समेत प्रधानमन्त्रीसँग छफल गरेका छन् । प्रचण्डले उच्चस्तरीय राजनीतिक संयन्त्रको प्रस्ताव गर्दैआएका छन् ।
छलफलमा ओली सरकारले गरेका सबै असंवैधानिक नियुक्तिहरु पनि खारेज गर्ने सहमति भएको छ ।
प्रतिक्रिया