काठमाडौं । माओवादी केन्द्रका अध्यक्ष प्रचण्ड आज बिहानै देखि नेताहरुसँग भेटवार्ता गर्न दौडधुप शुरु गरेका छन् । बिहानै एमाले वरिष्ठ नेता माधव नेपाललाई भेट्न नेपाल निवास कोटेश्वर पुगेका प्रचण्ड त्यहाँबाटै सिधै प्रधानमन्त्री शेरबहादुर देउवा भेट्न बालुवाटार पुगेका छन् ।
अध्यक्ष प्रचण्डको एमाले नेपाल पक्षलाई सरकारमा सहभागी गराउने मनसाय विपरित नेपाल पक्षले पार्टी एकताको पक्षमा लाग्ने निर्णय गरेपछि प्रचण्डले आफ्नो भेटवार्तालाई तिब्र बनाएका हुन् ।
नेपाल पक्षलाई सम्मानजनक रुपमा सरकारमा सहभागी बनाउने योजना विपरित नेपाल पक्षको सोमबारको स्थायी कमिटी बैठकले पार्टी एकतामा जोड दिने र गालीगलौज नगर्ने निर्णय गरेपछि सत्ता साझेदारीको प्रयास अन्यौलमा परेको छ ।
माधव नेपालसित करिब ४५ मिनेट छलफल गरेर अध्यक्ष प्रचण्ड प्रधानमन्त्री देउवालाई भेट्न बालुवाटार पुगेका छन् ।
नेपाल पक्षलाई सरकारमा सहभागी गराउने, संवैधानिक आयोगहरुमा नियुक्ति र मन्त्रिपरिषद विस्तारबारे वरिष्ठ नेता नेपालसँग छलफल गरेर प्रचण्ड प्रधानमन्त्री निवास पुगेका हुन् ।
प्रतिक्रिया