बुटवल । भारतीय बजारमा भन्दा नेपालमा डिजेलको मुल्य सस्तो भएपछि भारतबाट नेपाल आएका मालबाहक ट्रकहरुले फर्कने क्रममा डिजेलको अवैध निकासी गर्ने गरेको खुलासा भएको छ । रुपन्देही प्रहरीले आज ठुलो परिमाणमा डिजेल भारत तर्फ निकासी गर्दै गर्दा फेला पारेपछि ईन्धन तस्करीको खुलासा भएको हो ।
भारतबाट नेपाल तर्फ सामान लिएर आएको मालबाहक गाडी फर्कने क्रममा ५०० लिटर बढी डिजल भरेर भारत तर्फ फर्कँदै गर्दा प्रहरीले पक्राउ गरेको छ । भारतीय नम्बर प्लेट आरजे ०२ जीबी ४०५६ नम्बरको २२ चक्के गाडीमा अतिरिक्त ट्याङ्की जडान गरि भारत तर्फ डिजेल ओसार्दै गरेको अवस्थामा प्रहरीले सो गाडी र गाडीका चालकलाई पक्राउ गरि भन्सार कार्यालय बुझाएको छ ।
प्रहरीले अवैध निकासी हुँदै गरेको ५०० लिटर डिजेल सहितको गाडी र गाडीका चालक भारत राजस्थानका राजेश डागुर र सहचालक ओमप्रकाश समेतलाई नियन्त्रणमा लिई भन्सार कार्यालय चलान गरिएको रुपन्देही प्रहरी प्रवक्ता प्रहरी नायव उपरिक्षक सत्यनारायण थापाले बताए । प्रहरीले अन्दाजी ४० लाख ४ हजार बराबरको मुल्याँकन गरि भान्सार कार्यालय बेलहियामा चलान गरिएको डीएसपी थापाले बताए ।
प्रतिक्रिया