नेपालगन्ज । पूर्व पश्चिम राजमार्ग अन्तर्गत बाँके खण्डको बाँके निकुञ्ज क्षेत्रमा बाघले मान्छे खाएपछि स्थानीय प्रशासनले राजमार्गको तोकिएको क्षेत्रलाई निषेधित क्षेत्र घोषणा गरेको छ । बाँकेको गाभर क्षेत्रमा एकजना होटलमा काम गर्ने भारतीय मजदुरलाई बाघले खाएपछि प्रशासनले पैदलयात्रु, साईकल तथा मोटरसाईकलमा यात्रा गर्न निषेध गरेको हो ।
जिल्ला प्रशासन कार्यालय बाँकेले एक सूचना प्रकाशित गर्दै राजमार्गको शिवखोला क्षेत्रमा साँझ ७ बजेबाट बिहान ६ बजेको समयमा पैदल, साईकल र मोटरसाईकलमा यात्रा गर्न निषेध गरेको जनाएको छ । भाद्र २८ गते बिहानै बाघले एकजनाको ज्यान लिएको र सोही क्षेत्रमा बाघको आउने जाने क्रम पनि देखिएको भन्दै प्रशासनले स्थानीय सर्वसाधारणलाई सतर्क रहन समेत सूचित गरेको छ ।
प्रशासनले प्राबिधिक सहितको टोली परिचालन गरि बाघ नियन्त्रणमा लिने प्रयास भईरहेको जनाउँदै अर्को सूचना जारी नहुँदा सम्म निषेधको निर्णय लागु हुने जनाएको छ ।
२८ गते बिहान स्थानीय होटलका कामदारलाई बाघले खाएको थियो । अघिल्लो राती देखि हराईरहेका उनको सबै शरिर बाघले खाएको अवस्थामा खुट्टामात्र भेटिएको थियो । त्यस लगत्तै स्थानीयले सोही क्षेत्रमा बाघ र बघीनी एकसाथ बसिरहेको अवस्थामा देखेका थिए ।
प्रतिक्रिया