उदयपुरमा थप एकजनामा कोरोना संक्रमणको पुष्टि, संक्रमितको संख्या ३२ पुग्यो

काठमाडौ । उदयपुरका थप एक पुरुषमा कोरोना भाइरसको संक्रमण भएको पुष्टि भएको छ ।

स्वास्थ्य तथा जनसंख्या मन्त्राललयले मंगलबार गरेको नियमित पत्रकार सम्मेलनमा प्रवक्ता डा. विकास देवकोटा ३३ वर्षीय पुरुषमा कोरोना संक्रमण भएको पुष्टि गरेका हुन् । उनको राष्ट्रिय जनस्वास्थ्य प्रयोगशाला स्वाब परीक्षण गरिएको हो ।

नयाँ संक्रमित उदयपुरको त्रियुगा नगरपालिका–३ भुल्केस्थित मस्जिदकै रहेको बताइएको छ । यसअघि मस्जिदमा रहेका १३ जनामा कोरोना संक्रमण देखिएको थियो ।

नेपालमा कोरोना संक्रमण देखिएकामध्ये चारजना निको भएर घर फर्किएका छन् । तीमध्ये काठमाडौंको टेकु अस्पतालबाट दुईजना, बागलुङस्थित धौलागिरि अस्पतालबाट एकजना र कैलालीस्थित सेती अस्पतालबाट एकजना उपचार गरेर घर फर्किएका हुन् ।

अहिले विभिन्‍न अस्पतालमा २७ जना संक्रमितको उपचार भइरहेको छ। टेकु अस्पतालमा एक, पर्सास्थित नारायणी क्षेत्रीय अस्पतालमा चार, बाग्लुङको धौलागिरि अस्पतालमा अस्पतालमा एक, सेती अस्पतालमा चार, विराटनगरस्थित कोरोना अस्पतालमा १३ जना र चितवनस्थित कोरोना अस्पतालमा दुईजनाको उपचार भइरहेको छ ।