काठमाडौं । चेन्नई सुपरकिंग्सले इन्डियन प्रिमियर लिग (आईपीएल) को उपाधि जितेको छ ।
यूएईमा सम्पन्न खेलमा कोलकाता नाइट राइडर्सलाई २७ रनले हराउँदै महेन्द्रसिंह धोनीको टिम चेन्नई सुपर किंग्सले चौथो पटक उपाधि जितेको हो ।
च्याम्पियन चेन्नईले १० करोड भारु र उपविजेता कोलकताले ६ करोड २५ लाख भारु पुरस्कार पाएका छन् ।
दुबई अन्तर्राष्ट्रिय रंगशालामा टस जितेर फिल्डिङ रोजेको कोलकाताले १९३ रनको लक्ष्य पाएको थियो । कोलकाताले निर्धारित ओभरमा ९ विकेट गुमाउँदै १६५ रन जोडेको थियो ।
सुरुआती ब्याटिङका लागि निस्किएको चेन्नईले निर्धारित पूरा ओभर खेल्दै तीन विकेटको क्षतिमा १९२ रन बनाएको थियो । चेन्नईका लागि ओपनर फाफ डुप्लेसिसले सर्वाधिक ८६ रनको अर्धशतकीय पारी खेले । उनले ५९ बलमा सात चौका र तीन छक्कासहित सो रन जोडेका थिए । अर्का ओपनर रितुराज गायक्बडले ३२ रन बनाए । त्यस्तै, रोबिन उथप्पाले ३१ रन बनाए भने मोइन अलीले ३७ रन बनाएका थिए ।
चेन्नईले यसअघि २०१०, २०११ र २०१८ मा उपाधि जितेको थियो । चेन्नईले २०१० मा मुम्बई इन्डियन्सलाई २२ रनले पराजित गर्दै पहिलो पटक च्याम्पियन बनेको थियो ।
२०११ मा चेन्नईले बेंगलोरलाई ५८ रनले पराजित गर्दै लगातार उपाधि जितेको थियो । २०१८ मा हैदराबादलाई ८ विकेटले पराजित गर्दै चेन्नई तेस्रो पटक च्याम्पियन बनेको थियो । चेन्नई २००८, २०१२, २०१३, २०१५ र २०१९ मा उपविजेता बनेको थियो ।
कोलकत्ताले सन् २०१४ मा आईपीएलको उपाधि जितेको थियो ।
प्रतिक्रिया