बलिउडलाई एक पछि अर्को पिडा, रहेनन् ऋषि कपुर

बुटवल, १८ बैशाख । बलिउडले यो हप्ता एक पछि अर्को गर्दै सशक्त अभिनेताहरु गुमाएको छ । बुधबार मात्र अभिनेता इरफान खान गुमाएको बलिउडले आज अर्को चर्चित अभिनेता ऋषि कपुरलाई गुमाएको छ । उनको ६७ वर्षको उमेरमा बिहीबार निधन भएको भारतीय सञ्चारमाध्यमहरुले लेखेकाछन् । क्यान्सरबाट पीडित ऋषि कपुर अस्वस्थ भएपछि बुधबार अस्पताल भर्ना गरिएको थियो ।
भाइ रणधीर कपुरका अनुसार ऋषिलाई क्यान्सर र स्वासप्रश्वाससम्बन्धी समस्या थियो । अमेरिकामा करिब एक वर्षसम्म क्यान्सरको उपचार गराएपछि उनी गत वर्ष सेप्टेम्बर महिनामा भारत फर्किएका थिए । फेब्रुअरी महिनामा पनि स्वास्थ्य बिग्रिएपछि उनलाई दुई पटकसम्म अस्पताल भर्ना गर्नु परेको थियो ।
स्वर्गिय कपुरका बबी, चांदनी, दिवाना, नागिना, प्रेम रोग, अमर अकबर एन्थोनी जस्ता चलचित्रहरु बलिउडमा चर्चित छन् ।