कीर्तिपुरमा पार्किङमा राखिएको कारमा आगलागी, एकजनाको जलेको शव फेला

काठमाडौं । काठमाडौंको कीर्तिपुरस्थित ट्यांग्लाफाँटमा पार्किङमा राखिएको एउटा निजी कारमा आगलागी हुँदा एक जनाको मृत्यु भएको छ।

जिल्ला प्रहरी परिसर काठमाडौंका अनुसार मंगलबार बिहान करिब ११ः२० बजे बा ५ च ३०३८ नम्बरको निजी कारमा अचानक आगलागी भएको थियो। आगो निभाएपछि चालक सिटमा रहेका एक व्यक्ति जलेको अवस्थामा मृत फेला परेका हुन्।

जिल्ला प्रहरी परिसर काठमाडौंका प्रमुख एसएसपी दिलीप घिमिरेका अनुसार मृतकको पहिचान खुल्न सकेको छैन। घटनाको कारण र मृतकको पहिचान खुलाउन प्रहरीले अनुसन्धान अघि बढाएको छ।

घटनाबारे जानकारी पाएलगत्तै जिल्ला प्रहरी प्रहरी टोली घटनास्थल पुगेको थियो। प्रहरीले घटनास्थलको मुचुल्का उठाउनुका साथै आगलागीको कारण, मृत्युको प्रकृति र अन्य सम्भावित पक्षबारे अनुसन्धान गरिरहेको जनाएको छ।