दाङ । नेकपा मसालका महामन्त्री मोहनविक्रम सिंहले एमाले अध्यक्ष केपी ओली शर्माका गतिविधिले हिन्दु राष्ट्रका पक्षधर र राजतन्त्र स्थापनाको अभियानमा लाग्नेहरुलाई सहयोग पुगिरहेको बताएका छन् । प्रगतिशील पत्रकार सङ्घ दाङले आज घोराहीमा आयोजना गरेको पत्रकार सम्मेलनमा महामन्त्री सिंहले कम्युनिष्ट पार्टीको अध्यक्षले दुई÷दुईपटक संसद् भङ्ग गर्ने, पशुपतिनाथमा सुन चढाउनेदेखि चितवनमा राममन्दिर स्थापना गर्नेलगायतका धार्मिक गतिविधिहरूले नेपाललाई हिन्दू राष्ट्र कायम गर्नेदेखि राजतन्त्र स्थापनाको आन्दोलनमा सहयोग पुगेको बताएका हुन् ।
उनले ओलीका कारण देशमा गम्भीर प्रतिगमनको खतरा बढेको बताउँदै ओलीका हरेक क्रियाकलापले प्रतिगमनलाई प्रश्रय दिने काम गरिरहेको आरोप लगाए ।
ओलीका गतिविधिहरु नेपाललाई धर्मनिरपेक्षताबाट हटाएर हिन्दू राष्ट्र कायम गर्ने र त्यसैको आडमा राजतन्त्र पुनःस्थापना गर्नेतर्फ केन्द्रित रहेको महामन्त्री सिंहको ठहर छ । ‘मध्यावधि निर्वाचनको बहानामा संसद् भङ्ग गर्ने देखावटी खेल मात्र हो । भित्री रहस्य हिन्दू राष्ट्र कायम गर्ने र राजतन्त्र पुनःस्थापना गर्ने हो,’ उनले भने ।
उनले सर्वोच्च अदालतमा भएको आन्दोलनका कारण अहिले गम्भीर समस्या देखिएको भन्दै आन्दोलनलाई लामो समयसम्म जान दिन नहुने बताए ।
सिंहले प्रधानन्यायाधीशका विरुद्धमा न्यायाधीशहरु र बारलगायतले गरेको आन्दोलन सही रहेको उल्लेख गर्दै न्यायिक सुधारका लागि प्रधानन्यायाधीशलाई हटाउनै पर्ने बताए ।
प्रतिक्रिया