काठमाडौं । सत्तारुढ गठबन्धनले राष्ट्रिय सभा चुनावमा गठबन्धनका उम्मेदवारहरूलाई जिताउन अपील गरेको छ ।
गठबन्धनमा आवद्ध दलहरूबीच राजनीतिक समन्वयका लागि गठित उच्चस्तरीय राजनीतिक समन्वय समितिको बिहीबार बसेको बैठकले आफ्ना उम्मेदवारहरुलाई जिताउन अपील गरेको हो । बैठकले चुनावलाई लक्षित गरेर सातवटै प्रदेशमा राजनीतिक संयन्त्र निर्माण गर्ने निर्णय गरेको छ ।
बैठकपछि सञ्चारमन्त्री ज्ञानेन्द्रबहादुर कार्कीले राष्ट्रियसभामा गठबन्धनका उम्मेदवारहरूलाई विजयी गराउन अपिल गर्ने निर्णय गरेको जानकारी दिएका छन् । कार्कीका अनुसार सत्ता गठबन्धनले सातवटै प्रदेशमा संयन्त्र निर्माण गर्ने र केन्द्रको समन्वय समितिले समेत काम गर्नेछ ।
आगामी माघ १२ गते राष्ट्रियसभामा रिक्त २० पदका लागि निर्वाचन हुँदैछ । सत्ता गठबन्धनले सातै प्रदेशमा साझा उम्मेदवार उठाएको छ ।
बैठकले प्रधानमन्त्री शेरबहादुर देउवाको भारत भ्रमणको सफलताको शुभकामना समेत दिएको छ । देउवा चार दिने भारत भ्रमणका लागि आगामी आइतबार २५ सदस्यीय टोलीसहित जाँदैछन् ।
उच्चस्तरीय राजनीतिक समन्वय समितिको संयोजक कांग्रेस नेता रामचन्द्र पौडेल रहेका छन् । बैठकमा प्रधानमन्त्री शेरबहादुर देउवा, माओवादी अध्यक्ष प्रचण्ड, एकीकृत समाजवादीका अध्यक्ष माधवकुमार नेपाल लगायतका नेताहरु सहभागी थिए ।
प्रतिक्रिया