संविधान सभा सदस्य दुमनसिंह थापाको निधन

काठमाडौं । संविधानसभाका सदस्य डा. दुमनसिंह थापाको निधन भएको छ । ६० वर्षीय थापाको आइतबार काठमाडौंमा निधन भएको हो ।

अर्घाखाँची क्षेत्र नं. २ बाट संविधानसभामा तत्कालीन नेकपा एमालेबाट उनी निर्वाचित भएका थिए । उनी संविधान सभा २०७० को निर्वाचनमा अर्घाखाँची २ बाट निर्वाचित भएका थिए ।

एमाले विभाजन भएपछि एकीकृत समाजवादीमा लागेका उनी पार्टीको केन्द्रीय निर्वाचन आयोग सदस्य रहेका थिए । उनले मृगौला प्रत्यारोपण गराएका थिए ।

थापाको जन्म अर्घाखाँचीको नरपानी वडा-७ मा सन् १९६२ मा भएको थियो । उनले विकास र समाजशास्त्रमा विद्यावारिधि गरेका थिए ।

उनको निधनप्रति समवेदना प्रकट गर्दै एकीकृत समाजवादीका अध्यक्ष माधवकुमार नेपालले थापाको निधनले पार्टीलाई अपूरणीय क्षति भएको बताएका छन् ।