बुटवल । स्थानीयतहको निर्वाचनमा उम्मेदवारी दर्ता गर्न १५ दिन बाँकी रहँदा सम्म लखन थापाको अपमान गरेको भन्दै एमाले अध्यक्ष केपी ओलीको पुत्ला जलाउने जनमुक्ति पार्टीका कार्यकर्ता चुनावमा एमालेसँगै गठबन्धन गरिरहँदा बुटवलमा काँग्रेसका मेयर पदका उम्मेदवार भने ओलीले अपमान गरेको लखन थापाको सालिकमा माल्यार्पण गर्न पुगेका छन् ।
बुटवल उपमहानगरपालिकामा नेपाली काँग्रेसका मेयर पदका उम्मेदवार खेलराज पाण्डेयले नेपाल सरकारले प्रथम शहिद घोषणा गरेको लखन थापा मगरको शालिकमा माल्यार्पण गरेर सोमबारको घरदैलो प्रारम्भ गरेका छन् ।
नेता कार्यकर्ताको साथमा बिहानै लखन चोकमा पुगेका पाण्डेयले प्रथम शहिद लखन थापा मगरको शालिकमा माल्यणपण गर्दै श्रद्धासुमन ब्यक्त गरे ।
नेपालका प्रथम शहिदलाई सम्मान गर्दै पाण्डेयले आजको घरदैलो कार्यक्रमको सुरुवात गरेको पाण्डेले बताए । शहिदको योगदानले गर्दा देशमा परिवर्तन आएको र त्यही परिवर्तनको जगमा उभिएर अहिलेको निर्वाचन भएको उनले भने ।
एमाले अध्यक्ष ओलीले १ महिना पहिले काठमाडौंको एक कार्यक्रममा नेपालको प्रथम सहिद लखन थापा नभएको बताएका थिए । ओलीले नेपालको पहिलो सहिद बाँकाबीर भएको घोषणा समेत गरेका थिए ।
ओलीको अभिब्यक्तिले गर्दा रूपन्देहीमा मगर संङ्घे रूपन्देहीमा उनको पुत्ला समेत जलाएका थिए ।
प्रतिक्रिया