बुटवलको कोरोना अस्पतालमा आइसीयू थपिँदै

बुटवल । बुटवल कोरोना विशेष (अस्थायी) अस्पतालमा आइसीयू र भेन्टिलेटरसहितका बेडहरु थप गरिँदै छ ।

बुटवल उप–महानगरपालिका र लुम्बिनी प्रादेशिक अस्पतालको सहकार्यमा धागो कारखानामा निर्माण भएको बुटवल कोरोना विशेष (अस्थायी) अस्पतालमा १० बेडको आइसीयूसहित भेन्टिलेटर कक्ष निर्माण कार्य अन्तिम चरणमा पुगेको प्रमुख शिवराज सुवेदीले जानकारी दिनुभयो ।

प्रमुख सुवेदीसहित लुम्बिनी प्रादेशिक अस्पतालका अध्यक्ष सुर्यबहादुर भट्टराई, गौतम बुद्ध सामुदायिक अस्पतालका अध्यक्ष एजाज आलम सहित विभिन्न क्षेत्रका स्वास्थ्यकर्मी र प्राबिधिकहरु काममा खटिनुभएको छ ।

आइतबार (आज) बेलुकासम्ममा तयार गर्नेगरी काम भइरहेको कोरोना विशेष अस्पताल समन्वय समितिका सदस्यसमेत रहनुभएका गौतमबुद्ध सामुदायिक मुटु अस्पतालका अध्यक्ष आलमले जानकारी दिनुभयो ।

बुटवलका स्वास्थ्य संस्थाहरुमा झण्डै दुई हजार जनाको परीक्षण

यसैबीच बुटवलका विभिन्न ठाउँमा रहेका स्वास्थ्य संस्थाहरुमा झण्डै दुई हजार जनाको ज्वरो, रुघाखोकी र स्वासप्रस्वासको समस्यासहितका विभिन्न फ्लूको परीक्षण भएको छ ।

फिवर क्लिनिकमा आशंका लागेर जचाउँन गएकाहरुको परीक्षण गरिएको हो । उनीहरुमा कोरोनाको त्रास रहेपनि लक्षण भने नरहेको स्वास्थ्य शाखा प्रमुख सिंहले जानकारी दिनुभयो ।

केही आशंका लागेका वा सामान्य लक्षण मिल्ने एक सय ७१ हरुलाई लुम्बिनी प्रादेशिक अस्पतालमा पठाइएको उहाले बताउनुभयो ।