काठमाडौं । सत्तारुढ नेपाल कम्युनिष्ट पार्टी नेकपाभित्र तिब्र अन्तसंघर्ष चलिरहेको बेला नेपालका लागि चिनियाँ राजदूत हउ यान्छीले नेकपाका शीर्ष नेताहरू अलगअलग भेट गर्नुभएको छ ।
राजदूत यान्छीले शुक्रबार अध्यक्ष पुष्पकमल दाहाल प्रचण्डसँग खुमलटारमा भेटवार्ता गर्नुभएको छ । प्रचण्डलाई भेटेलगत्तै यान्छीले कोटेश्वर पुगेर नेता माधवकुमार नेपाललाई पनि भेट गर्नुभएको छ ।
भेटमा कोरोना भाइरसको महामारी रोकथाम र नियन्त्रणका लागि चीनले गर्ने सहयोगको विषयमा छलफल भएको बताइएको छ । ‘अध्यक्ष प्रचण्डले कोरोना भाइरसको महामारी रोक्न चीन सरकारले गरेको सहयोगप्रति धन्यवाद दिँदै आगामी दिनमा समेत चीन सरकार र पार्टीबाट सहयोग जारी रहने अपेक्षा लिएको बताउनुभएको छ’, प्रचण्डका प्रेस संयोजक विष्णु सापकोटा जानकारी दिनुभयो । जवाफमा राजदूत यान्छीले नेपाललाई आवश्यक पर्ने सहयोग जारी रहने बताउनुभएको थियो ।
नेकपाभित्र तिब्र अन्तसंघर्ष चलिरहेको बेला नेकपा नेताहरुसँग चिनिया राजदूतको भेटलाई अर्थपूर्ण मानिएको छ । प्रधानमन्त्री एवं पार्टी अध्यक्ष केपी शर्मा ओली र अध्यक्ष प्रचण्ड एवं नेता नेपालको असमझदारी बढिरहेको छ । ओलीले पार्टी र सरकारमा एकलौटी काम गरेको भन्दै प्रचण्ड–नेपाल पक्षले प्रधानमन्त्रीको राजीनामा नै मागिरहेको छ ।
चिनियाँ कम्युनिष्ट पार्टीसँग नेकपाको उच्चस्तरको सम्बन्ध रहेको छ । राजदूत यान्छी र नेकपा नेताहरुबीच भएको भेटवार्तामा पार्टी भित्रको विवाद र समाधानका उपायबारे समेत छलफल भएको अनुमान लगाउन सकिन्छ ।
नेकपा विदेश मामिला विभाग प्रमुख नेता नेपाल र राजदूत यान्छीबीच दुई देशबीचको सम्बन्धका विविध आयाममा छलफल भएको विभागका उपप्रमुख विष्णु रिजालले जानकारी दिनुभएको छ ।
गत सोमबार चिनियाँ राष्ट्रपति सी चिङफिङले राष्ट्रपति विद्यादेवी भण्डारीसँग टेलिफोनमा कुराकानी गर्नुभएको थियो ।
प्रतिक्रिया