सुर्खेत । सुर्खेतको एक क्वारेन्टिनबाट घर फर्किएका युवकको कोरोना संक्रमणबाट मृत्यु भएको पुष्टि भएको छ ।
पश्चिम सुर्खेतको जनता मावि विद्यापुर क्वारेन्टिमा बसेका ती युवकको आरडीटी नेगेटिभ आएपछि क्वारेन्टिनबाट घर
फर्किएका थिए । तर उनको बिहीबार बिहान मृत्यु भएको थियो ।
मृत्यु पछि पुनः पीसीआर परीक्षण गर्दा भने ती युवकमा कोरोना संक्रमण पोजेटिभ देखिएको कर्णाली प्रदेश स्वास्थ्य निर्देशनालय प्रयोगशालाले जनाएको छ ।
पञ्चपुरी नगरपालिका-१ हाँसेका २० वर्षीय युवक यही जेठ ७ गते भारतबाट आएर विद्यापुरको जनता मावि क्वारेन्टिमा बसेका थिए । आरडीटी रिपोर्ट नेगेटिभ आएपछि उनी २१ गते बुधबार घर फर्किका थिए । तर, बिहीबार बिहान २ बजे उनको मृत्यु भएको थियो ।
जनता मावि क्वारेन्टिमा ५४ जना रहेका थिए । क्वारेन्टिमा बसेकाहरुको परीक्षण गर्दा तीन जनालाई पोजेटिभ देखिएको तर मृतक युवकसँगै बसेका पाँच जनामा भने नेगेटिभ रिपोर्ट आएको थियो ।
यससँगै नेपालमा कोरोनाबाट मृत्यु हुनेको संख्या ११ पुगेको छ । मृत्युको आधिकारिक जानकारी स्वास्थ्य तथा जनसंख्या मन्त्रालयले अपरान्ह आयोजना गर्ने पत्रकारसम्मेलनमार्फत जानकारी हुनेछ ।
प्रतिक्रिया