काठमाडौं । इंग्लिस प्रिमियर लिग फुटबल अन्तर्गत सोमबार राति भएको खेलमा म्यानचेस्टर सिटीले शानदार जित दर्ता गरेको छ । घरेलु मैदानमा भएको खेलमा पेप गार्डिवलाको टिम म्यानचेस्टर सिटीले बर्नलीलाई ५–० ले परजित गरेको हो ।
पहिलो हाफमा तीन गोल गरेको सिटीले दोस्रो हाफमा थप दुई गोल गरेको हो उसका लागि फिल फोडिन र रियाद महरेजले दुई–दुई गोल गरे। यस्तै डेविड सिल्भाले एक गोल गरे ।
फोडिनले २२ र ६३ औँ तथा महरेजले ४३ र पहिलो हाफको इन्जुरी समयको तेस्रो मिनेटमा पाएको पेनाल्टीमा गोल गरेका हुन् । सिल्भाले ५१ औँ मिनेटमा गोल गरे ।
म्यानचेस्टर सिटीको यो जितले लिभरपुलको चाँडै नै उपाधि पक्का गर्ने यात्रा केही पर धकेलिएको छ। यो जितका कारण आउँदो खेलमा विजयी हुँदैमा लिभरपुलले उपाधि पक्का गर्न नपाउने भएको छ ।
दोस्रो स्थानको सिटीको जितपछि ३० खेलबाट ६३ अंक भएको छ । शीर्ष स्थानको लिभरपुलको समान खेलबाट २० अंक बढी रहेको छ । ११ औँ स्थानको बर्नलीको ३० खेलबाट ३९ अंक रहेको छ ।
प्रतिक्रिया