काठमाडौं । म्यानचेस्टर युनाइटेडले शीर्ष चारमा उक्लिने महत्वपूर्ण मौका गुमाएको छ ।
इंग्लिस प्रिमियर लिग फुटबल अन्तर्गत सोमबार राति भएको खेलमा साउथह्याम्पटनसँग बराबरीमा रोकिएर म्यानचेस्टर युनाइटेडले लेस्टर सिटीलाई पछि पारी चौथो स्थानमा पुग्ने मौका गुमाएको हो ।
घरेलु मैदानमा भएको खेलमा म्यानचेस्टर युनाइटेड साउथह्याम्पटनसँग २–२ को बराबरीमा रोकिएको हो । पहिलो हाफमा लिएको २–१ को अग्रता म्यानचेस्टर युनाइटेडले इन्जुरी समयको अन्तिम मिनेटमा गुमायो ।
१२ औँ मिनेटमा आर्मस्ट्रोङ्गले गोल गरी साउथह्याम्पटनलाई अग्रता दिलाए । २० औँ मिनेटमा मार्कस रासफोर्डले गोल गरी युनाइटेडलाई बराबरीमा ल्याए । २३ औँ मिनेटमा एन्थोनी मार्शलले गोल गरी अग्रता दिलाए ।
तर इन्जुरी समयको छैटौँ अर्थात ९६ औँ मिनेटमा ओबाफेमीले गोल गरी युनाइटेडको जित अस्वीकार गरे र साउथह्याम्पटनलाई बराबरी गराए ।
बराबरीपछि पाँचौँ स्थानको म्यानचेस्टर युनाइटेडको ३५ खेलबाट ५९ अंक भएको छ । चौथो स्थानको लेस्टर सिटीको पनि ५९ अंक नै भए पनि गोल अन्तगरका आधारमा अघि रहेको हो । ४५ अंकसहित साउथह्याम्पटन १२ औँ स्थानमा रहेको छ ।
प्रतिक्रिया