काठमाडौं । सत्तारुढ नेपाल कम्युनिस्ट पार्टी ९नेकपा०को स्थायी कमिटी बैठक भोलि अर्थात साउन २ गते बस्दैछ ।
सहमति नभए पुनः सर्ने यो बैठक अघि आज अध्यक्ष पुष्पकमल दाहाल प्रचण्ड र वरिष्ठ नेता माधवकुमार नेपालले अर्का अध्यक्ष एवं प्रधानमन्त्री केपी शर्मा ओलीसँग छलफल गरेका छन् ।
छलफलका क्रममा दुवै नेताले ओलाईलाई प्रधानमन्त्रीबाट राजीनामा दिन आग्रह गरेका छन् ।
पार्टीभित्र ओलीको राजीनामा मागिएपछि निरन्तर विवादको भुँमरीमा परेको नेकपा स्थायी कमिटी बैठक बस्नु अघि भएको तीन नेताको छलफलमा दुई नेताले राजीनामा मागेका हुन् । तर, ओलीले भने पूर्ववत रुपमै राजीनामा नदिने अडान व्यक्त गरेका छन् ।
यसअघि प्रचण्ड र ओलीको मात्रै भेट हुनेगरेको थियो । तर, आज भने अर्का नेता नेपालपनि प्रचण्डसँगै वालुवाटार पुगेका थिए । छलफलमा महासचिव विष्णु पौडेल पनि सहभागी थिए ।
ओलीसँग भेट्न अघि प्रचण्ड–नेपाल समुहका नेताहरु खुमलटारमा छलफल गरेका थिए । छलफलमा ओलीको राजीनामा माग्ने अडान कायमै राख्ने सहमति भएको थियो ।
पार्टीमा सहमति खोज्न भन्दै एकसातासम्म स्थगित गरिएको स्थायी कमिटी बैठक भने भोलि पनि हुने या नहुनेमा अन्यौल देखिएको छ । शिर्ष नेताहरुबीच सहमति नभए बैठक पुनः स्थगित हुनसक्ने एक स्थायी कमिटी सदस्यले बताए ।
नेकपाका २० जना स्थायी कमिटी सदस्यहरुले पार्टीको बैठक बोलाउन गत बैशाखमा सामुहिक हस्ताक्षर गरेका थिए । तर, ति मध्ये केही नेताहरुले भने अहिले हस्ताक्षरलाई दुरुपयोग गरिएको टिप्पणी गर्न थालेका छन् ।
उनीहरुले पार्टीको बैठक बोलाउनका लागि सामुहिक हस्ताक्षर गरिएको तर पार्टी अध्यक्ष एवं प्रधानमन्त्री हटाउनका लागि हस्ताक्षर नगरिएको जिकिर गरेका छन् । उनीहरु हरहालतमा पार्टी एकता जोगिनुपर्ने लाइनमा रहेका छन् ।
प्रतिक्रिया