बुटवल । नेपाल रेडक्रस सोसाईटी, रक्तसंचार केन्द्र बुटवलमा रगतको माग दैनिक ७० युनिट छ ।
रगत आवश्यक परेका बिरामीहरु केन्द्रमा अस्पतालको सिफारिसमा लिन आउनेको भिड नै हुने गर्दछ । दैनिक रगत खपत हुने केन्द्रमा दाताहरुको पनि अभाव भने छैन । कोरोना भाईरसका कारण चार महिना लामो लकडाउन चलिरहदा यहाको मागलाई सामाजिक संघसंस्थाहरुले आकस्मिक रक्तदान मार्फत पुरा गरिरहेको छ ।
केन्द्रका ल्याब इन्चार्ज तथा सदस्य सचिव जोग बहादुर गुरुङले कार्यालयमा लुम्बिनी प्रादेशिक अस्पतालका बिरामीलाई कुल संकलनमध्ये ५० प्रतिशत खपत हुने बताए । यो क्षेत्रमा मृगौलाका बिरामीहरुको डायलोसिस सेवा शुरु भएसंगै उनिहरुको माग समेत बढेको उनले बताए । ‘सामान्यतया क्यान्सर, थाल्सेमिया, डायलोसिस, मेजर अपरेशन, एनिमिया, सिकलसेल, प्रसुति केसहरुमा रगतको माग छ ।’– उनले भने ।
रुपन्देहीमात्र नभई नारायणगढ, काठमाडौं क्षेत्रमा हुने माग समेत बुटवलले धान्ने गरेको नेपाल स्वयंसेवी रक्तदाता समाज रुपन्देहीका अध्यक्ष कृष्ण चौहान क्षेत्रीले बताए । ‘आजै ५ युनिट एबी पोजिटिभ रगत चितवन पठाउदै छौ ।’– उनले भने । हरेक दिन जसो रगतको माग बढेको उनले बताए । रगत अभाव रोक्न दैनिक जसो रक्तदान कार्यक्रम जारी रहेको उनले बताए ।
लक डाउन अवधिको ४ महिनामा केन्द्रबाट ५ हजार १ सय ७९ युनिट रगत संकलन भएको छ । बिरामीहरुले कम्पोनेन्ट, प्याक सेल र होल ब्लड गरि ६ हजार ३६ युनिट रगत लगेका छन । चैत महिनामा १ हजार ६४ संकलन भएर १ हजार २ सय ९४ कम्पोनेन्ट सहित खपत भएको छ । यसैगरि बैशाख १ हजार ५ सय १२ संकलन र १ हजार ४ सय ९३ खपत भएको छ । यसैगरि जेठमा १ हजार ४५ युनिट संकलन र १ हजार ४ सय ४९ युनिट खपत भएको छ ।
असारमा १ हजार ५ सय ५८ युनिट संकलन र १ हजार ८ सय युनिट खपत भएको छ । यसैगरि रगत अभावको समस्यामा रोटरी क्लब अफ रुपन्देही तिलोत्तमाले शनिबार रक्तदान गरेको छ । रोट्याक्ट क्लब अफ तिलोत्तमा देवदह र रोट्याक्ट क्लब अफ तिलोत्तमा रुपन्देहीको सहआयोजनामा सोमबार गरिएको आकस्मिक रक्तदानमा ९० युनिट रगत संकलन भएको संयोजक सन्जय प्रकाश श्रेष्ठले बताए ।
नेपाल पत्रकार महासंघ प्रदेश ५ का उपाध्यक्ष भरत केसीले ब्लड बैकका प्राविधिक प्रमुख राधा शर्मालाई ब्लड ब्याग हस्तान्तरण गरेर उद्घाटन गर्दै रगत अभावमा परेका विरामीहरु बुटवलमा समस्या रहदैन भनेर उदाहरण दिन सफल भएको दाबी गरे । यहाका संघसंस्थाहरु निरन्तर लाग्दा समस्या टरेको उनले बताए ।
कार्यक्रममा एजी खिमानन्द भुषाल, क्लबमा अध्यक्ष गोपाल ज्ञवाली, पुर्वअध्यक्ष नवीन श्रेष्ठ, बालकृष्ण अर्याल, ओम अर्यालले समाजमा नया कामसहित अघि बढ्नुपर्ने बताए ।
प्रतिक्रिया