कोरोना भाइरसको भ्याक्सिन निर्माणमा सकारात्मक परिणाम प्राप्त गरेकोमा विश्व स्वास्थ्य संगठन डब्लुएचओले बेलायतको अक्सफोर्ड विश्वविद्यालयलाई बधाई दिएको छ ।
जेनेभामा आयोजित पत्रकार सम्मेलनमा डब्लुएचओका आपतकालिन कार्यक्रम निर्देशक डा. माइक रेयानले अक्सफोर्डका कोरोना भ्याक्सिन निर्माणमा संलग्न वैज्ञानिकहरुलाई बधाई दिएका हुन् ।
डब्लुएचओले अक्सफोर्डको नतिजालाई स्वागत गर्दै कोरोनाको फैलिँदो संक्रमणबाट लड्नका लागि अझै धेरै काम गर्न जरुरी रहेको बताएको छ ।
डा. रेयानले भनेका छन्, ‘यो निकै सकारात्मक परिणाम हो तर अझै लामो बाटो तय गर्न बाँकी नै छ ।’ उनले भनेका छन्, ‘अब वास्तविक ट्रायल पनि ठूलो परिणाममा हुन जरुरी छ ।’
कोरोनाका लागि अहिलेसम्म विश्वभर २३ भ्याक्सिनमा काम भैरहेको छ । डा. रेयानले भनेका छन्, ‘उपचारको खोजीमा भैरहेको भ्याक्सिन निर्माणको काम सकारात्मक देखिनु राम्रो हो ।’
डब्लुएचओ प्रमुख डा. टेड्रोस एदनहोम गेब्रेयासिसले कुनै पनि सफल भ्याक्सिन सबैका लागि उपलब्ध हुनुपर्ने बताएका छन् । उनले कैयौं देश भ्याक्सिन बनाउनका लागि एक विश्वव्यापी सार्वजनिक सेवाको रुपमा लागिरहेका छन् जबकी केही देश उल्टो दिशामा लागेको जनाएका छन् ।
‘देशहरुबीच आम सहमति हुँदैन भने जोसँग पैसा हुन्छ उनीहरुसँगै मात्र भ्याक्सिन हुनेछ जसको किन्ने क्षमता हुनेछैन उनीहरुले भ्याक्सिन पाउने छैनन्’, डा. टेड्रोसले भनेका छन्, हामीहरुको सबै मानिसको जीवन बचाउनु छ ।’ उनले भ्याक्सिन निर्माणको रफ्तार बढाउन आवश्यक रहेको पनि बताए ।
प्रतिक्रिया