पोखरा । कोरोनाको उच्च जोखिमलाई ध्यानमा राखी आजदेखि लागू भएको जोरबिजोर प्रणाली गण्डकीमा लागू नहुने भएको छ । सरकारले २ सय जनाभन्दा बढी सक्रिय सङ्क्रमित रहेका जिल्लामा यो नियम लागू गर्ने निर्णय गरेको थियो ।
गण्डकी प्रदेशका सबै ११ जिल्लामा २ सयको सङ्ख्यामा सक्रिय सङ्क्रमित नभएका कारण जोरबिजोर प्रणााली लागू नहुने भएको हो । प्रदेश स्वास्थ्य निर्देशनालयका निर्देशक विनोदविन्दु शर्माले प्रदेशको कुनै पनि जिल्लामा २ सयको हाराहारीमा सक्रिय सङ्क्रमित नरहेको जानकारी दिए । निर्देशक शर्माका अनुसार हालसम्म २६ हजार ३८ जनाको स्वाब सङ्कलन गरिएको छ । तीमध्ये २४ हजार ४ सय ७२ को नेगेटिभ रिपोर्ट आएको छ ।
गण्डकीमा बिहीबारसम्म कोरोना सङ्क्रमितको सङ्ख्या १ हजार ५ सय ६६ पुगेको छ । सङ्क्रमितमध्ये एक हजार ३ सय ६२ निको भएका छन् । पछिल्लो २४ घण्टामा ३ सय १५ को कोरोना परीक्षण भएको छ भने हालसम्म चार जनाको कोरोनाका कारण मृत्यु भएको छ । त्यसैगरी क्वारेन्टिनमा १ हजार ११ रहेका छन् भने आइसोलेसनमा २ सय ११ छन् । प्रदेशमा हालसम्म भारतबाट १२ हजार २ सय ९१ र तेस्रो मुलुकबाट ५ हजार १ सय ४ जना आएको तथ्याङ्क छ ।
प्रदेशभर बिहीबार बिहानसम्म ११ जनामा कोरोना पुष्टि भएको छ । देशका विभिन्न तीन प्रयोगशालामा गरिएको परीक्षणमा चार जिल्लाका ११ जनामा कोरोना पोजेटिभ देखिएको हो । पोजेटिभ देखिने जिल्लामा कास्कीमा १, पर्वतमा १, गोरखामा ६ र नवलपुरमा ३ सङ्क्रमित थपिएको स्वास्थ्य निर्देशनालयले जनाएको छ । कास्कीका १ सङ्क्रमित पोखरा महानगरपालिका–४ का २२ वर्षे पुरुष रहेका छन् ।
जनस्वास्थ्यको मापदण्डानुसार २ सय जनाभन्दा बढी सक्रिय कोरोना सङ्क्रमित रहेका जिल्लामा बिहीबारदेखि सवारी साधनमा जोरबिजोर प्रणाली लागू गर्न गृह मन्त्रालयलये निर्देशन दिएको छ । मन्त्रालयका अनुसार २ सय जनाभन्दा बढी सक्रिय सङ्क्रमित रहेका जिल्लामा बेलुका ९ देखि बिहान ५ बजेसम्म आवागमनमा समेत रोक लगाइएको छ । कास्कीका प्रमुख जिल्ला अधिकारी ज्ञानप्रसाद ढकालले कास्की जिल्लामा पनि २ सय जना सक्रिय कोरोना सङ्क्रमित नभएकाले जोरबिजोर लागू नहुने बताए । रासस
प्रतिक्रिया