जन्म दिने आमाको हत्या गर्ने छोरा प्रहरी नियन्त्रणमा

दार्चुला । दार्चुलाको दुहु गाउँपालिका-३ मा आफ्नै आमाको हत्या अभियोगमा १ जनालाई प्रहरीले पक्राउ गरेको छ । दुहु गाँउपालिका-३ चौपाती बस्ने ५३ वर्षीय नर बहादुर बमलाई आफ्नै आमाको हत्या गरेको अभियोगमा प्रहरीले पक्राउ गरेको हो । बमले आफैलाई जन्म दिने ८२ वर्षीया आमा नारु देवी बमको हत्या गरेको प्रहरीले बताएको छ ।

घरयासी झगडामा बमको कुटपिटबाट आमाको मृत्यु भएपछि घरबाट करिब ५० मिटर टाढा खोला नजिक फालेको प्रहरीले जनाएको छ । स्थानीयबासीले हत्या गरेर फालेको खबरका आधारमा स्थानीय प्रहरी चौकी ब्रम्हदेव र जिल्ला प्रहरी कार्यालयबाट खटिएको प्रहरीले उनलाई पक्राउ गरेको हो ।
घटनाको सम्बन्धमा प्रहरीले थप अनुसन्धान गरिरहेको प्रहरीले जनाएको छ ।