कोरोना संक्रमित बढेपछि भरतपुर महानगर क्षेत्रमा शुक्रबार राति १२ बजेदेखि निषेधाज्ञा घोषणा

चितवन । कोरोना भाइरसका संक्रमित दिनदिनै बढ्न थालेपछि भरतपुर महानगरपालिकामा शनिबारदेखि निषेधाज्ञा लाग्ने भएको छ ।

शुक्रबार भरतपुर महानगरपालिकामा भएको छलफलपछि शुक्रबार राति १२ बजेदेखि महानगरपालिका क्षेत्रमा निषेधाज्ञा लगाउने निर्णय भएको हो ।

छलफलमा नगरप्रमुख रेनु दाहाल, प्रमुख जिल्ला अधिकारी नारायणप्रसाद भट्टराई, जिल्ला प्रहरी प्रमुख नान्तीराज गुरूङ, चितवन उद्योग संघ, उद्योग वाणिज्य संघ, यातायात व्यवसायीलगायत सरोकारवाला निकायका प्रतिनिधिहरुबीच सहभागी भएका थिए ।
तत्कालका लागि एक सातासम्मको निषेधाज्ञा जारी गर्ने निर्णय भएको छ । निषेधाज्ञा अवधिमा अत्यावश्यक सेवा बाहेक अन्य सबै सेवा संचालनमा रोक लगाइने भएको छ ।

अध्यावश्यक सेवा प्रयोगकर्ताले पनि स्वास्थ्य सुरक्षा मापदण्डलाई अनिवार्य पालना गर्नुपर्ने निर्णय भएको प्रमुख जिल्ला अधिकारी नारायणप्रसाद भट्टराईले जानकारी दिए ।

निषेधाज्ञा जारी भएसँगै महानगर क्षेत्रभित्र सार्वजनिक यातायातमा पुरै रोक लगाइएने छ । यस्तै, उद्योगधन्दा तथा कलकारखानाहरू सञ्चालनमा समेत कडाई गर्दै कारखानाभित्रै बसोबास गर्ने मजदुर कर्मचारीले मात्र काम गर्न अनुमति दिइने भएको छ ।

निषेधाज्ञा उल्लंघन गरेको पाइएमा कडा कारवाही गरिने सीडीओ भट्टराईले बताए ।

चितवनमा सबैभन्दा बढी कोरोना संक्रमित भरतपुर महानगरपालिका भित्रै भेटिएका छन् । भरतपुर महानगरभित्र कोरोना भाइरस समुदायस्तरमै फैलिएको स्वास्थ्य विज्ञहरुले बताएका छन् । बिहीबार साँझ मात्रै भरतपुरमा ९ जनामा कोरोना भाइरस संक्रमण पुष्टि भएको थियो ।