धुलिखेल । कोरोना भाइरसको संक्रमणबाट काभ्रेपलाञ्चोक जिल्ला पनि अछुतो छैन । जिल्लामा भाइरसका संक्रमित ८० जना पुगेको छ । दुई जनाको मृत्यु भएको छ ।
पछिल्लो रिपोर्ट अनुसार कोरोना भाइरसको संक्रमणबाट काभ्रेको धुलिखेल नगरपालिका वडा नं. ७ का ९८ वर्षीय वृद्धको मृत्यु भएको छ ।
साउन २७ गते संक्रमण पुष्टि भएका ती वृद्धको उपचारको क्रममा धुलिखेल अस्पतालमा मंगलबार बिहान १ बजे मृत्यु भएको काभ्रेका प्रमुख जिल्ला अधिकारी श्रवणकुमार तिमिल्सिनाले जानकारी दिएका छन् ।
स्वास्वप्रश्वासमा गम्भीर समस्या देखिएपछि उनको आइसीयूमा राखेर उपचार भइरहेको थियो।
मृतकको शवलाई कोरोनाबाट मृत्यु भएका व्यक्तिको शव व्यवस्थापन कार्यविधि अनुसार व्यवस्थापना गरिने भएको छ । पशुपति आर्यघाटस्थित विद्युतीय शवदाहगृहमा उनको शवको अन्तेष्टि हुने बताइएको छ ।
यससँगै काभ्रेमा कोरोनाको संक्रमणबाट मृत्यु हुनेको संख्या दुई पुगेको छ । यसअघि पाँचखाल नगरपालिकाकी ५० वर्षीया एक महिलाको उपचारकै क्रममा ललितपुरको किष्ट अस्पतालमा मृत्यु भएको थियो ।
प्रतिक्रिया