काठमाडौं । काठमाडौं उपत्यकामा कोरोना भाइरसका संक्रमितको संख्या निरन्तर उकालो लागिरहेको छ ।
मंगलबार उपत्यकामा २०५ जना संक्रमित थपिएका छन् ।
काठमाडौंमा १३८ जना, ललितपुरमा ५० जना र भक्तपुरमा १७ जना संक्रमित थपिएको स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले बताए ।
ललितपुरमा एकै दिन यति ठूलो संख्यामा संक्रमित थपिएको यो नै पहिलो पटक हो ।
घना वस्ती भएको काठमाडौं उपत्यकामा संक्रमितको संख्या बढ्ेसँगै महामारी फैलिने डर झन बढ्दै गएको छ ।
कोरोनाको संभावित संक्रमण रोक्न सरकारको कमजोर तयारी र आम मानिस स्वयंले गरेको चरम हेलचक्र्याईंकै कारण उपत्यकामा संक्रमण बढिरहेको छ ।
संक्रमण रोक्न पूर्ण निषेधाज्ञा लगाउनुपर्ने अवस्था आइसकेको जनस्वास्थ्यविद् एवं उपत्यकाका स्थानीय प्रशासनले निस्कर्ष निकाल्न थालेका छन् ।
पूर्व स्वास्थ्यमन्त्री एवं नेपाली काँग्रेसका नेता गगन थापाले काठमाडौं उपत्यकासहित कोरोना हटस्पटहरुमा जनस्वास्थ्य आपतकाल घोषणा गर्न प्रधानमन्त्री केपी शर्मा ओलीसँग माग गरेका छन् ।
प्रतिक्रिया