काठमाडौं । सरकारले हालसम्म पीसीआर टेष्ट गर्दा ३ अर्ब १८ करोड ९४ लाख ४४ हजार ५०० रुपैयाँ खर्च भएको जनाएको छ ।
स्वास्थ्य तथा जनसंख्या मन्त्रालयका प्रवक्ता प्राडा. जागेश्वर गौतमका अनुसार हालसम्म ५ लाख ७९ हजार ८९९ पीसीआर परीक्षण भएको छ ।
एउटा पीसीआर परीक्षण गर्दा सरकारको ५ हजार ५०० रुपैयाँ खर्च हुन्छ । हालसम्म देशभर ३० हजार ४८३ जना संक्रमित भेटिएका छन् ।
अर्थात, एक जना संक्रमितको खोजी गर्दा १ लाख ४ हजार ६३० रुपैयाँ खर्च भैरहेको छ ।
एक जना कोरोना संक्रमित खोज्दा नै यतिधेरै रकम खर्चिनु परेपछि झन भयावह अवस्था आउदाँ राज्यको रकम कति खर्च होला ।
स्वास्थ्य मन्त्रालयका प्रवक्ता डा. गौतम आग्रह गर्छन्, घरबाहिर ननिस्कि कोरोना संक्रमित हुनबाट आफु जोगिँदा राज्यको पनि १ लाख ४ हजार ६३० रुपैयाँ जोगाउन सकिन्छ ।’
प्रवक्ता गौतम भन्छन्, ‘ल्याब टेस्ट गर्दा मात्र यति धेरै रकम खर्च भएको छ । पीपीई लगायतका अन्य अत्यावश्यक स्वास्थ्य सामाग्रीको त यसमा हिसाब नै गरिएको छैन ।’
संक्रमित बिरामीलाई आईसीयूमा ३० दिनसम्म राख्नुपर्दा एक जनालाई ४ लाख ५० हजार न्यूनतम खर्च गर्नुपर्ने पनि उनले बताए ।
यो त भयो दृश्यमा आएको खर्च । स्वास्थ्य सामाग्री खरिदमा गरिएको अनियमितताबारे सर्वसाधारण जनतासमेत यसअघि नै जानकार छन् ।
प्रतिक्रिया