काठमाडौं । नेपाल पत्रकार महासंघले सञ्चारकर्मीहरुको निःशुल्क पीसीआर परीक्षणको व्यवस्था मिलाउन आग्रह गरेको छ ।
महासंघले सोमबार एक विज्ञप्ति जारी गर्दै संक्रमणको उच्च जोखिका बीच फिल्डमा खटिने सञ्चारकर्मीहरुको निःशुल्क पीसीआर परीक्षणको व्यवस्था मिलाउन सम्बन्धित पक्षसँग आग्रह गरेको हो ।
महासंघले संक्रमणको दर वृद्धि भएसंगै पछिल्लो समयमा अग्रभागमा रहेर कार्य गरिरहेका सञ्चारकर्मीहरूमा समेत संक्रमण देखिने क्रम बढेको जनाएको छ ।
विज्ञप्तिमा भनिएको छ, ‘हालसम्म कम्तीमा तीन दर्जन सञ्चारकर्मी संक्रमित भइसकेको बताउँदै महासंघले फिल्डमा खटिने सम्वाददाता, फोटो पत्रकार र क्यामेरापर्सनहरु संक्रमणको उच्च जोखिममा रहेका छन् ।’
महामारीको समयमा संक्रमणबाट जोगिन आफ्नो स्वास्थ सुरक्षालाई उच्च प्राथमिकतामा राखेर मात्रै काम गर्न महासंघले आम सञ्चारकर्मीहरुमा अपिल पनि गरेको छ ।
महामारीको जटिल परिस्थितिमा पनि नेपाली सञ्चार क्षेत्रले उच्च जोखिम मोलेर समाचार संकलन तथा सम्प्रेषण गरिरहेको बताउँदै महासंघले सञ्चार प्रतिष्ठानहरूले पनि अति आवश्यक बाहेक घरबाटै काम गर्ने व्यवस्था मिलाउन आग्रह गरेको छ ।
यस्तै, कार्यालय तथा फिल्डमा खटिने सञ्चारकर्मीहरुका लागि स्वास्थ्य सामग्रीको प्रयोग संगै पर्याप्त सचेतता अपनाउने वातावरण निर्माण गर्न पनि महासंघ आग्रह गरेको छ ।
प्रतिक्रिया