काठमाडौं । पछिल्लो २४ घण्टामा ११ जना कोरोना संक्रमितको मृत्यु भएको छ ।
स्वास्थ्य तथा जनसंख्या मन्त्रालयका अनुसार २ महिला र ९ पुरुष गरी ११ जनाको मृत्यु भएको हो ।
मन्त्रालयका प्रवक्ता प्राडा जागेश्वर गौतमले दिएको जानकारी अनुसार महोत्तरीमा सबैभन्दा धेरै ३ जना पुरुषको मृत्यु भएको छ । उनीहरु ६०, ७२ र ७५ वर्षका रहेका थिए ।
यस्तै, कैलालीमा ४५ र ५० वर्षका दुई जना पुरुषको मृत्यु भएको छ । यसैगरी बारामा ४१ र ४६ वर्षका दुई पुरुषको मृत्यु भएको छ ।
यसैगरी मोरङका ४५ वर्षीया र भक्तपुरका ५१ वर्षीया महिलाको पनि कोरोना संक्रमणका कारण मृत्यु भएको डा. गौतमले जानकारी दिएका छन् ।
यस्तै, बाँकेका ३७ वर्षीय एक पुरुष र काठमाडौंका ५१ वर्षीय पुरुषको पनि कोरोना संक्रमणबाट पछिल्लो २४ घण्टाभित्र मृत्यु भएको छ ।
मन्त्रालयका अनुसार हालसम्म देशभर कोरोना संक्रमणका कारण मृत्यु हुनेको संख्या १७५ पुगेको छ ।
प्रतिक्रिया