नेपालगन्ज । बुधबार ७३ जना नयाँ संक्रमित थपिएका बाँकेमा बिहीबार बिभिन्न आइसोलेसनमा उपचाररत २२ जना संक्रमित संक्रमण मुक्त भएर घर प्रस्थान गरेका छन् ।
संक्रमण पुष्टि भएर १४ दिन बिना लक्षण आइसोलेसनमा बसेका २२ जनालाई घर पठाईएको जिल्ला स्वास्थ्य कार्यालय बाँकेका कोरोना फोकलपर्सन नरेशबाबु श्रेष्ठले बताए । श्रेष्ठका अनुसार खुला कारागारबाट ६ जना, खजुरास्थित सुशील कोइराला प्रखर क्यान्सर अस्पतालबाट ५ जना, होटल सिटी प्यालेसबाट ४ जना, लायन्स डेन्टल अस्पतालको आइसोलेसनबाट ३ जना, प्राथमिक स्वास्थ्य केन्द्र बैजनाथबाट २ जना, कृषि तालिम केन्द्र खजुरा र नेपालगन्जको आदर्शनगर आइसोलेसनबाट एक एक जना डिस्चार्ज भएका छन् । आज डिस्चार्ज हुनेहरुमा नेपालगन्जका १५ जना र कोहलपुरका ७ जना रहेको स्वास्थ्य कार्यालयले जनाएको छ ।
बुधबार संक्रमण पुष्टि भएसँगै नेपालगन्ज स्थित नेपाल टेलिकमको बितरण केन्द्र अर्को सुचना जारी नहुँदा सम्मका लागि बन्द भएको छ । बुधबार टेलिकममा कार्यरत ८ जना कर्मचारीमा संक्रमण पुष्टि भएको थियो । बुधबार नै बाँकेको कौशिलानगर स्थित ब्यारेकका ५१ जना नेपाली सेनाका जवानहरुलाई संक्रमण पुष्टि भएको थियो ।
जिल्लामा कुल संक्रमित ९ सय २० रहेकोमा बिहीबारसम्म ६ सय ८२ जना डिस्चार्ज भइसकेका छन् । आइसोलेसनमा २ सय ३३ जनाको उपचार भइरहेको छ भने कोरोनाबाट पाँच जनाले ज्यान गुमाएका छन् ।
प्रतिक्रिया