भेरी अस्पतालमा सुर्खेत र दाङका कोरोना संक्रमितको मृत्यु

नेपालगन्ज । कोरोना भाइरसको संक्रमणबाट बाँकेमा आइतबार दुई जनाको मृत्यु भएको छ ।

सुर्खेतको सिम्ता गाउँपालिका वडा नं. ३ सुर्खेत निवासी ७१ वर्षीय लालबहादुर सिंहको भेरी अस्पतालमा मृत्यु भएको हो ।

बिरामी भएपछि यहि भदौ १ गते भर्ना भएका सिंहको सोहिदिन गरिएको पीसीआर परीक्षणमा कोरोना संक्रमण पुष्टि भएको थियो । उनको आज मध्यराति १२ बजेर २० मिनेट जाँदा मृत्यु भएको अस्पतालले जनाएको छ ।

यसैगरी दाङ तुलसीपुर उपमहानगरपालिका वडा नं. ६ का ५५ वर्षीय खिमबहादुर केसीको मृत्यु भएको छ । साउन २७ गते पीसीआर परीक्षणमा कोरोना पुष्टि भएपछि उनी २८ गते अस्पताल भर्ना भएका थिए । उनको आज बिहान ५ बजे मृत्यु भएको अस्पतालले जनाएको छ ।

यससँगै बाँकेमा अन्य जिल्लाबाट उपचार गर्न आएर मृत्यु हुनेको संख्या ३९३ पुगेको छ । बांके जिल्लाको मात्रै मृत्युु संख्या भने ३२६ रहेको छ ।