बुटवल । तिलोत्तमा नगरपालिकाले आउंदै गरेको सोह्र श्राद्ध भर्चुअल बिधिबाट गराउन पुरोहितहरुलाई आग्रह गरेको छ ।
शुक्रबार एक सुचना जारी गर्दै नगरपालिकाले सोह्र श्राद्धमा छरछिमेक, ईस्टमित्र भेला नगराउन, श्राद्ध खान आफन्त नबोलाउन र गुरु पुरोहितले पनि बिद्युतिय माध्यमबाट श्राद्ध गर्न गराउन आग्रह गरेको छ ।
एकैजना पुरोहित धेरै घरमा श्राद्ध गराउन जाने परम्पराले कोरोनाको जोखिम उच्च हुने हुँदा बिद्युतिय माध्यम (भर्चुअल) बिधि अपनाई सोह् श्राद्ध सम्पन्न गर्न नगरपालिकाले सुचनामा भनेको छ ।
आश्विन कृष्णपक्षलाई पितृपक्ष मानेर हिन्दु धर्मालम्बीहरुले सोह्रदिन सम्म तिथि अनुसार पितृ तर्पण दिने र श्राद्ध गर्ने गर्दछन् । भाद्र १७ गतेबाट यस वर्षको सोह्र श्राद्ध सुरु हुँदैछ ।
नगरपालिकाले बिबाह, ब्रतबन्ध, न्वारान, मृत्युसंस्कार जस्ता परम्परागत रिती रिवाजमा समेत जमघट कम गर्ने गरि ब्यवस्था मिलाउन नगरबासीलाई आग्रह गरेको छ ।
तिलोत्तमामा १०० बढी संक्रमण पुष्टि हुनुका साथै २ जनाको कारोनाका कारण ज्यान गईसकेको छ ।
प्रतिक्रिया