काठमाडौं । काठमाडौं उपत्यकामा फेरि एक साता निषेधाज्ञा लम्बिएको छ ।
काठमाडौं उपत्यकाका तीन जिल्लाका प्रमुख जिल्ला अधिकारीहरुले गृहमन्त्रालयसँग छलफल पछि निषेधाज्ञा थप गर्ने निर्णय गरेका हुन ।
उपत्यकामा कोरोना भाइरसको संक्रमण दिनप्रतिदिन बढ्न थालेपछि गत भदौ ३ गतेदेखि निषेधाज्ञा लाग्दै आएको थियो ।
एक एक हप्ता लगाईंदै आएको निषेधाज्ञा बुधबार राति १२ बजेबाट सकिँदैछ । यसपटकको निषेधाज्ञामा केही सेवा सञ्चालन थप भएका छन् ।
यसपटक होटल, रेष्टुरेण्टको ‘टेक अवे’ सेवालाई खुल्ला गरिएको छ । निर्माण सामग्री ढुवानीका गाडीमा अवरोध नगरिने भएको छ । यस्तै, स्वास्थ्य सुरक्षा मापदण्ड पुरा गरेर उद्योग धन्दा संचालन गर्न पाउने निर्णय गरिएको छ । तर, त्यसका लागि कारखाना भित्रै मजदुर राख्नुपर्नेछ ।
यस्तै, भन्सार तिरेका गाडी र मोटरसाईकललाई काठमाडौं उपत्यकामा ल्याउन छुट गरिएको छ ।
यसअघि अत्यावश्यक सेवाका औषधी र खाद्यवस्तु खरिदमा रोक लगाइएको थिएन । तर, बिहान ९ बजेसम्म मात्र खाद्य तथा तरकारी पसलहरु मात्र खुल्न दिइएको थियो ।
अत्यावश्यक काममा घर बाहिर निस्किनेले अनिवार्य मास्क लगाउनुपर्ने नियम लगाइएको थियो ।
सरकारी एवं अत्यावश्यक कार्यालयका कर्मचारीहरुका लागि बिहान ९ बजेदेखि १ः३० बजेसम्म र दिउँसो ३ बजेदेखि ५ बजेसम्मका लागि मात्रै छुट दिइएको थियो ।
प्रतिक्रिया