काठमाडौं । प्रशासनको अनुमति विना रातो मत्स्येन्द्रनाथको रथ तानिएपछि ललितपुरको पुल्चोकमा स्थानीयबासिन्दा र प्रहरीबीच झडप भएको छ ।
निषेधाज्ञाको बीचमा ठूलो समुह जम्मा भै स्थानीय युवाहरुको पहलमा रथ तान्न थालेपछि प्रहरीले रोकेको थियो । तर, रथ तान्न रोकेको भन्दै युवाहरुले विरोध गरेपछि झडप नै भएको थियो । झडपमा उत्रिएका स्थानीय युवाहरुमाथि प्रहरीले पानीको फोहोरा हानेको छ ।
त्यसक्रममा प्रहरीले केही सेल अश्रुग्यांस पनि प्रहार गरेको छ । प्रहरीको प्रतिकारमा युवाहरुले ढुंगामुढा गरेका थिए ।
भिडभाड नगर्न आग्रह गर्दै रथ रोक्न अनुरोध गर्दा स्थानीयले अटेर गरेपछि झडप भएको ललितपुर प्रहरी प्रमुख एसएसपी टेकप्रसाद राईले बताएका छन् ।
कोरोना महामारीका कारण बढिरहेको संक्रमण रोक्न भन्दै सरकारले निषेधाज्ञा लगाएको छ । निषेधाज्ञाको अवधीमा ठूलो संख्यामा युवाको भिड जम्मा भएपछि प्रहरीले अवरोध गरेको थियो ।
अहिले पुल्चोक क्षेत्रमा ठूलो संख्यामा प्रहरी तैनाथ गरिएको छ । भिडलाई तितरबितर बनाएको छ ।
प्रतिक्रिया