बुटवल । प्रदेश ५ का मुख्यमन्त्री शंकर पोखरेल चढ्ने गाडी तोडफोड प्रयास भएको छ ।
प्रदेशको राजधानी बुटवलबाट दाङको भालुबाङ सार्ने सरकारको निर्णय विरूद्ध प्रमुख प्रतिपक्षी नेपाली काँग्रेसले आज रूपन्देही बन्दको आयोजना गरेको थियो ।
बन्दकै क्रममा बुटवलकाे राजमार्ग चाैक नजिकै प्रदेश ५ का मुख्यमन्त्री चढ्दै आएकाे गाडीमा ढुंगा प्रहार गरिएको हो । साँझ साढे ६ बजेतिर हानिएको ढुंगा लागेर गाडीमा केही क्षति पुगेकाे छ ।
प्रदर्शनकारीले प्रहार गरेको ढुंगा लागेर मुख्यमन्त्रीको स्कटिङमा रहेका प्रहरीका दुइ गाडीमा क्षति पुगेको छ ।
शनिबार काठमाडौं गएका मुख्यमन्त्री पोखरेल काठमाडौंबाट जहाजमा भरैरहवा हुँदै स्कटिङसहित बुटवल फर्किँदै थिए । ढुंगा प्रहारपछि मुख्यमन्त्री र अन्य गाडीलाई प्रहरी तालिम केन्द्रमा लगिएको छ ।
प्रहरीले घटनामा संलग्न भएको आरोपमा कांग्रेस युवा नेता एवं प्रदेशसभा सदस्यका उम्मेदवार विष्णु पोखरेल, नेविसंघका केन्द्रीय उपसभापति मुक्तिराज पौडेल, सञ्चारकर्मी कमला पाण्डेसहित ६ जनालाई पक्राउ गरेको कांग्रेस रुपन्देहीका सचिव रामकृष्ण खाँणले बताए ।
घटनाको थप विवरण आउन बाँकी रहेको छ ।
प्रतिक्रिया