शुक्रबार थपिए ४ हजार ३९२ नयाँ संक्रमित, ३ हजार ५२२ संक्रमणमुक्त

काठमाडौं । शुक्रबार कोरोना भाइरसका ४ हजार ३९२ जना नयाँ संक्रमित थपिएका छन् ।

१६ हजार ५३१पीसीआर परीक्षण गर्दा ४ हजार ३९२ जनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।
यससँगै हालसम्म नेपालमा कोरोना संक्रमितको कुल संख्या १ लाख २६ हजार १३५ पुगेको छ ।

आज देशभर ३७ हजार ३८२ जना संक्रिय संक्रमित रहेको मन्त्रालयका प्रवक्ता प्राडा जागेश्वर गौतमले बताए । जसमध्ये संस्थागत आइसोलेसनमा १२ हजार ३३६ जना र होम आइसोलेसनमा २५ हजार ४६ जना रहेका छन् ।

संस्थागत आइसोलेसनमा भन्दा होम आइसोलेसनमा बस्नेहरु निकै धेरै रहेका छन् ।

यसैगरी पछिल्लो २४ घण्टामा ३ हजार ५२२ जना संक्रमण मुक्त भएका छन् । यसरी संक्रमण मुक्त हुनेको संख्या ८८ हजार ४० पुगेको छ ।

पछिल्लो २४ घण्टामा २१ जना संक्रमितको निधन भएको छ। यससँगै नेपालमा संक्रमणका कारण निधन हुनेको संख्या ७ सय १५ रहेको स्वास्थ्य तथा जनसंख्या मन्त्रालयले जनाएको छ।