काठमाडौं । नेपाल कम्युनिष्ट पार्टी नेकपाभित्र तिब्र विवाद चलिरहेको बेला प्रधानमन्त्री एवं पार्टी अध्यक्ष केपी शर्मा ओली र वरिष्ठ नेता माधवकुमार नेपाल बीच भेट भएको छ ।
कार्यकारी अध्यक्ष पुष्पकमल दाहाल प्रचण्ड र वरिष्ठ नेता नेपालसहित सचिवालयका पाँच सदस्यले बैठक बोलाउन लिखित आग्रह गरेको भोलिपल्ट अध्यक्ष ओलीले नेपालसँग छलफल गरेका हुन् ।
छलफलका लागि ओलीले नेपाललाई बालुवाटार आउन आग्रह गरेका थिए । छलफलमा नेता नेपालले आफु निकट नेताहरु सुरेन्द्र पाण्डे, भीम रावल र रघुजी पन्तलाई पनि सँगै लिएर गएका छन् ।
यसअघि पनि ओलीले नेपालसँग भेट गरेर प्रचण्डले पूर्वएमाले समुहमा खेलेको जिकिर गर्दै आफुहरु मिल्नुपर्ने प्रस्ताव गरेको समाचार सार्वजनिक भएको थियो । ओलीले सहकार्यका लागि प्रस्ताव गरे पनि नेता नेपालले ओलीको कार्यशैली सुध्रिनुपर्ने बताएका थिए । नेपालले विधि र पद्धतिअनुसार मात्रै पार्टी र सरकार संचालन गर्नुपर्ने माग गर्दै आएका छन् ।
शनिबार सचिवालयका पाँच सदस्यसहित बैठकको मागपत्र लिएर ओलीसमक्ष पुगेका नेताहरुले पार्टीभित्रको संकट समाधान गर्न तत्कालै बैठक बस्नुपर्ने माग गरेका थिए । त्यसक्रममा नेता नेपालले ओलीको कार्यशैलीको आलोचना गरेका थिए ।
सचिवालयमा अल्पमतमा परेका ओलीले त्यसैकारण बैठक बोलाउन आनाकानी गरिरहेका छन् । ओलीले प्रचण्ड–नेपाल समिकरणलाई कमजोर बनाउने रणनीतिअन्तर्गत आइतबार नेपाललाई छलफलका लागि बोलाएको एक नेताले बताएका छन् । पार्टीभित्र संकट पर्दा नेता नेपाललाई सम्झिने गरेका ओलीले अरु समयमा भने वास्ता गर्ने गरेका छैनन् ।
प्रतिक्रिया