बालिका हत्या आरोपी साहको घरमा स्थानीयद्वारा आगजनी

महोत्तरी । महोत्तरीको बर्दिबासमा ६ वर्षीया बालिकालाई हत्या गरेको अभियोग लागेका अरुण साहको घरमा स्थानीयले आगो लगाइदिएका छन् ।

हत्याको विरोधमा मंगलबार बिहानैदेखि प्रदर्शनमा उत्रिएका स्थानीयले साहको घर तोडफोड गर्दै आगजनी गरेका हुन् । आक्रमण भीडलाई नियन्त्रणमा लिने क्रममा प्रहरी र स्थानीयबीच झडप समेत भएको छ ।

आगो नियन्त्रण लिन आएको दमकललाई समेत प्रदर्शनकारीले अवरोध गरेका छन् ।

प्रदर्शनका कारण पुर्व–पश्चिम राजमार्ग पुर्णरुपमा बन्द भएको छ भने स्थानीयले मुख्य सडकको चोक–चोकमा टायर बालेर प्रर्दसन गरेका छन ।

बालिकाको हत्या गरेको स्वीकार गरिसकेका साहले किन हत्या गरे भन्ने बिषय भने अझै खुल्न सकेको छैन । स्थानीयले भने बलात्कारपछि हत्या गरेको आशंका गरेका छन् । बालिकाको शवको प्रकृति हेर्दा बलात्कार नै गरेको पुष्टि हुने उनीहरुले बताएका छन् । हत्या आरोपी साह मंगलबार बिहानै पक्राउ परिसकेका छन् ।

अभियुक्त अरुण साह अपराधीक मानसिकताको भएको र उसको अपराधमा प्रहरीले समेत साथ दिएको स्थानीयले आरोप लगाएका छन् । साह यसअघि पनि दुई पटक यस्तै घटनामा संलग्न भएपनि प्रहरी र नेताहरुको संरक्षणमा उन्मुक्ति पाएको उनीहरुको आरोप छ ।

गत आइतबार साँझ चकलेट किन्न भनेर घरबाट बाहिर निस्केकी बर्दिबास नगरपालिका वडा नंं १४ निवासी शहिद आलमकी ६ वर्षीया छोरी गुलाब साह खातुन त्यसपछि वेपत्ता थिइन ।

बालिका खातुनको शव हत्या आरोपी अरुण साहकै घर नजिकैको खेतमा सोमबार राति फेला परेको थियो ।

खातुनको हत्या गरेर शवलाई बोरामा बेरेर झाडीमा फालेको अवस्थामा फेला परेको इलाका प्रहरी कार्यालय बर्दिबासले जनाएको छ ।

स्थानीयको घरमा खानतलासी लिने क्रममा अरुण साहको परिवारले अवरोध गरेपछि बालिकालाई साहकै घरमा लुकाएर राखेको आशंकामा प्रहरीले सोही घर र आसपासमा खोजतलास गरेको थियो ।