बाँकेमा कोरोना संक्रमणबाट एकजना सरकारी अधिकारी सहित २ जनको मृत्यु

नेपालगन्ज । बाँकेमा उपचाररत एकजना सरकारी अधिकारी सहित जिल्ला बाहिरबाट उपचारका लागि बाँके आएका २ जनाको कोरोना संक्रमणबाट मृत्यु भएको छ । एकजनाको भेरी अस्पताल नेपालगन्जमा र अर्काको नेपालगन्ज मेडिकल कलेज कोहलपुरमा मृत्यु भएको जिल्ला कोभिड संकट ब्यवस्थापन केन्द्र डीसीसीएमसी बाँकेले जनाएको छ ।

नेपालगन्ज उपमहानगरपालिकामा शिक्षा शाखा अधिकृतका रुपमा कार्यरत दानबहादुर विष्टको कोरोना भाइरस संक्रमणबाट निधन भएको हो । नेपालगन्ज उपमहानगरपालिका-४ का ५० वर्षीय विष्टको उचपारका क्रममा भेरी अस्पतालमा आइतवार निधन भएको पारिवारिक श्रोतले जानकारी दिएको छ ।

२६ गते देखि भेरी अस्पताल नेपालगन्जमा भर्ना रहेका बिष्टको बिहान ३ः३० बजे निधन भएको अस्पतालले जनाएको छ । कडा खाले कोभिडका कारण उहाँको निधन भएको अस्पतालले जनाएको छ ।

त्यसैगरि, गत २७ गते नेपालगन्ज मेडिकल कलेज कोहलपुर भर्ना भएका डोटी सिलगढी ५ का ४९ वर्षीय थप १ जना पुरुषको उपचारका क्रममा मृत्यु भएको छ । उपचारका क्रममा शनिबार राती ७ः४५ बजे उनको मृत्यु भएको डीसीसीएमसी बाँकेका कोरोना फोकल पर्शन तेज ओलीले जानकारी दिए ।

बाँकेमा उपचारका लागि आएका जिल्ला बाहिरका कोरोना संक्रमित मध्य मृत्यु हुनेको संख्या ६८ पुगेको छ भने बाँके जिल्ला भित्रका ४१ जनाको कोरोना संक्रमणबाट मृत्यु भएको छ ।