काठमाडौं । प्रधानमन्त्री केपी शर्मा ओलीले असंवैधानिक रुपमा प्रतिनिधिसभा विघटन गरेपछि उत्पन्न परिस्थितिबारे छलफल गर्न नेपाल कम्युनिष्ट पार्टी (नेकपा)का नेताहरु अलगअलग समुहगत छलफलमा व्यस्त हुन लागेका छन् ।
प्रधानमन्त्रीको असंवैधानिक कदमपछि पार्टी विभाजनको औपचारिक घोषणा मात्र बाँकी हुन लागेको अवस्थामा ओली निकट नेता र सांसदहरु बालुवाटारमा जम्मा हुन थालेका छन् । प्रचण्ड-नेपाल निकट नेता र सांसदहरु संसदको लोत्से हलमा भेला हुँदैछन् ।
ओलीले बिहान ९ बजे आफु निकटहरुलाई बालुवाटारमा बोलाएका हुन् । मध्यावधि चुनावको घोषणा गरेका ओलीले अब चुनावमा केन्द्रित हुन उनीहरुलाई निर्देशन दिने बुझिएको छ । सो भेलाबाट पार्टीमा प्रचण्ड–नेपालहरुले चाल्ने रणनीतिको काउन्टर गर्न समेत योजना बन्ने उनी निकट एक नेताले बताए ।
अध्यादेशमार्फत शासन चलाइरहेका ओलीले दल विभाजनसम्बन्धी अध्यादेश राष्ट्रपतिको टेबुलमा यस अघि नै पुर्याइसकेका छन् । संकटपर्दा आफ्नो छुट्टै पार्टी बनाउन सजिलो हुनेगरी अध्यादेश बनाएका ओलीले नेकपा (एमाले)को नाममा पार्टी अघि बढाउनेछन् । उनकै निर्देशनमा यसअघि नै एमाले पार्टी निर्वाचन आयोगमा दर्ता भैसकेको छ ।
ओलीले असंवैधानिक कदम चालेपछि मर्माहत भएका प्रचण्ड–नेपाली पक्षीय नेताहरु एवं सांसदहरु दिउँसो ३ बजे संसदको लोत्से हलमा भेला हुने भएका छन् । प्रधानमन्त्री निवासमै स्थायी कमिटीको बैठक बसेर ओलीमाथि अनुशासनको कारवाहीको प्रस्ताव केन्द्रीय कमिटीमा लैजाने निर्णय गरेका नेताहरुले सो भेलामा नेता सांसदहरुलाई विभाजनकारी ओली प्रवृत्तिविरुद्ध एकजुट बनिरहन निर्देशदन दिने बुझिएको छ ।
प्रचण्ड–नेपालहरुले सर्वोच्च अदालतले सरकार र राष्ट्रपतिको असंवैधानिक कमदलाई साथ नदिने विश्वास गरेका छन् । अदालतमार्फत पुनस्र्थापित हुने संसदमा आफ्नो पोजिशन बलियो बनाउन समेत अहिलेदेखि नै तयारी अवस्थामा रहनुपर्ने गरी नेताहरुबाट निर्देशन आउने प्रचण्ड निकट एक नेताले बताएका छन् ।
आजै नयाँ परिस्थितिबारे कसरी मिलेर जान सकिन्छ भन्नेबारेमा नेकपा, नेपाली काँग्रैस र राष्ट्रिय जनता पार्टी राजपाबीच पनि थप छलफल हुँदैछ ।
प्रतिक्रिया