काठमाडौं । सामाजिक सञ्जाल ट्विटरले अमेरिकाका राष्ट्रपति डोनाल्ड ट्रम्पको ट्विटर अकाउन्ट @realDonaldTrump सधैँका लागि बन्द गरिदिएको छ ।
ट्रम्पले हिंसालाई प्रशय दिने खालका ट्वीटहरु डिलिट नगरेका कारण थप हिंसा बढ्ने आशंकाले ट्वीटर अकाउन्ट बन्द गरेको ट्वीटरले जनाएको छ । ‘हालै उनले गरेका ट्विटको समीक्षा र घटना विचार गर्दा थप हिंसा भड्काउने जोखिम देखिएपछि हामीले राष्ट्रपति ट्रम्पको अकाउन्ट स्थायी रूपमै बन्द गरिदिएका छौ,’ ट्विटरले लेखेको छ ।
ट्वीटरले आफ्नो अकाउन्टमा प्रतिबन्ध लगाएपछि ट्रम्पने क्रुद्ध प्रतिक्रिया जनाउँदै आफु चुप लागेर नबस्ने चेतावनी दिएका छन् । सरकारी आधिकारिक @POTUS ह्याण्डलबाट जवाफ फर्काउँदै ट्रम्पले ट्वीटरको कदमले वाक स्वतन्त्रताको हनन गरेको जनाएका छन् । उनले ट्वीटरका कर्मचारीहरु डेमोक्रयाट् र उग्रवामपन्थीहरु मिलेर आफ्नो अकाउन्ट बन्द गरेको भन्दै ट्रम्पले ट्वीटरमाथि कारवाहीको संकेत गरेका छन् । सरकारले दिएको सेक्सन २३० विना ट्वीटर चल्न नसक्ने चेतावनी ट्रम्पको छ । यसबारे अन्य विभिन्न पक्षहरुसँग सम्बादमा रहेको र छिट्टै नयाँ घोषणा गर्ने उनले जनाएका छन् ।
दुई दिन अघि अमेरिकी संसदमा आफु समर्थकहरुले गरेको आक्रमणलाई ट्रम्पले देशभक्तिपूर्ण कार्य भन्दै ट्वीट गरेका थिए । पछि ट्वीटरले ट्रम्पको ट्विटर अकाउन्ट १२ घण्टाका लागि प्रतिबन्ध लगाएको थियो ।
गत बुधबार ट्रम्पका समर्थकले अमेरिकी संसदभित्रै हिंसात्मक आक्रमण गर्दा एक प्रहरी अधिकारीसहित ६ जनाको मृत्यु भएको थियो । बाइडेनको जित अस्वीकार गर्न ट्रम्पकै उक्साहटमा उक्त आक्रमण भएको अन्तर्राष्ट्रिय समाचार संस्थाहरुले जनाएका छन् ।
उक्त घटनापछि ट्रम्पले हिंसा भड्काउने पोस्ट जारी राखेको भन्दै ट्विटरले प्रतिबन्ध लगाएको हो । यसअघि पनि ट्विटरले ट्रम्पलाई सामाजिक सद्भाव खलबलिने सामग्री ट्विटरमा पोष्ट नगर्न बेलाबेलामा चेतावनी दिँदै अकाउन्ट बन्द गर्ने धम्की दिँदै आएको थियो ।
प्रतिक्रिया