काठमाडौं । सरकारले राष्ट्रिय सभाको हिउँदे अधिवेशन आजबाट अन्त्य गर्न लागेको छ ।
प्रधानमन्त्री केपी शर्मा ओलीले मन्त्रिपरिषदको बैठक बसालेर राष्ट्रिय सभाको अधिवेशन अन्त्य गर्ने निर्णय गरेका छन् ।
अधिवेशन आइतबार राति १२ बजेबाट अन्त्य गर्न राष्ट्रपतिलाई सिफारिस गर्ने मन्त्रिपरिषदले निर्णय गरेको छ ।
दुई वटा अधिवेशनबीचको अन्तर ६ महिनाभन्दा बढी हुन नहुने संवैधानिक बाध्यताका कारण सरकारले राष्ट्रिय सभाको अधिवेशन यही पुष १७ गते आह्वान गरेको थियो ।
तर पहिलो दिनदेखि नै प्रतिनिधिसभा विघटनसम्बन्धी विषयलाई प्रतिपक्षी दलहरुले कडा रुपमा उठाएपछि सभाको दोस्रो बैठकदेखि नै अधिवेशन अन्त्यको प्रयास भएको थियो ।
राष्ट्रिय सभा सञ्चालन गर्ने कुनै विजनेश नभएको भन्दै अधिवेशन अन्त्य गर्न लागिएको हो । यद्यपी, जनप्रतिनिधि संस्था प्रतिनिधिसभा विघटन गरेपछि जनपक्षीय एजेण्डा उठाउने सदनको अन्त्य गरेर सरकारले आफ्नो विरोध सुन्न नसक्ने चरित्र देखाएको भन्दै सांसदहरुले आपत्ति जनाएका छन् ।
अधिवेशन अन्त्य गर्नुअघि प्रधानमन्त्री केपी शर्मा ओलीले राष्ट्रिय सभालाई सम्बोधन गर्दैछन् ।
प्रतिक्रिया