ओलीसँग तत्काल एकताको सम्भावना छैन, पाँच सात वर्ष पछि के हुन्छ भन्न सकिन्न : प्रचण्ड

काठमाडौं । नेपाल कम्युनिष्ट पार्टी नेकपाका अध्यक्ष पुष्पकमल दाहाल प्रचण्डले प्रधानमन्त्री एवं नेकपाकै अध्यक्ष केपी शर्मा ओलीसँग तत्कालै एकताको सम्भावना नरहेको बताएका छन् ।

काठमाडौंमा बुधबार बिहान सम्पादकहरुसँगको अन्तक्र्रियामा बोल्दै अध्यक्ष प्रचण्डले ओलीले सार्वजनिक रुपमा गल्ती स्वीकार नगरेसम्म उनीसँग एकताको सम्भावना नरहेको बताएका हुन् । तर ओलीले आत्मालोचना गर्ने र गल्ती स्वीकार गर्ने सम्भावना नरहेको पनि प्रचण्डले बताए । पाँच सात वर्ष पछि के हुन्छ भन्न सकिन्न, तर अहिल्यै अब ओलसँग एकता हुन नसक्ने उनले स्पष्ट पारे ।

केपी ओलीलाई सहमति पालना गराउन र विधि पद्धतिमा हिँडाउन नसक्नुमा आफूहरुको कमजोरी भएको भन्दै प्रचण्डले त्यसप्रति आत्मआलोचना समेत गरेका छन् ।

प्रधानमन्त्री केपी शर्मा ओलीले देशलाई दुर्घटनातिर लैजान खोजेकाले आफूमा केही आवेग आएको पनि प्रचण्ड बताए । अलिकति आवेगमय त हुनै पर्‍यो भन्न खोजेको हो । उनले भने, ‘तर, मैले त्यसो भन्दै गर्दा शान्तिपूर्ण प्रतिस्पर्धात्मक प्रणालीको प्रतिबद्धता पनि सँगसँगै जोडेको थिएँ । ‘शाकाहारी’ शब्दको गलत व्याख्या हुँदा केही कन्फ्यूजन ल्याएको छ भन्ने महसुस मलाई भएको छ । ’

अध्यक्ष प्रचण्डले आफुहरु प्रधानमन्त्री पदका लागि मरिहत्ते गर्ने खालको मान्छे नभएको बताए । उनले भने, ‘हामी प्रधानमन्त्रीका लागि मरिहत्ते गर्ने मान्छे होइनौँ,’ उनले भने,‘ यो भन्दा बढी व्याख्या म गर्न चाहन्नँ । तपाईंहरुले देखिराख्नु भएकै छ । ’

अध्यक्ष प्रचण्डले देशमा ओलीले यति ठूलो दुर्घटना निम्त्याउलान भन्ने आफुले पहिला नसोचेको बताए ।