इजलासमा पेश गरे महान्यायाधिवक्ता खरेलले प्रतिनिधिसभा विघटनसम्बन्धी सूचनाको राजपत्र

काठमाडौं । सरकारले रातारात प्रतिनिधिसभा विघटनसम्बन्धी सूचना राजपत्रमा प्रकाशित गरेर सर्वोच्च अदालतको संवैधानिक इजलासमा पेश गरेको छ ।

महान्यायाधिवक्ता अग्नि खरेलले प्रतिनिधिसभा विघटन सम्बन्धी सूचना प्रकाशन गरिएको राजपत्र शुक्रबार इजलाससमपक्ष पेश गरेका हुन् ।

बिहीबार अधिवक्ता ओमप्रकाश अर्याल र वरिष्ठ अधिवक्ता टीकाराम भट्टराईले सरकारले राजपत्रमा सूचना प्रकाशित नगरेको विषय उठाएपछि इजलासभित्र सोधखोज गरेको थियो ।

राजपत्रको विषय उठेपछि चिया ब्रेकको समयमा इजलास छोडेका महान्यायाधिवक्ता खरेल त्यसपछिको बहसका क्रममा उपस्थितै भएका थिएनन् । राजपत्रमा सूचना प्रकाशित गर्नका लागि दौडधुप गरेका खरेलले रातारात सूचना प्रकाशित गराएर शुक्रबार आजको इजलाससमक्ष पेश गरेका हुन् ।

तर, महान्यायाधिवक्ता खरेलले राजपत्र बुझाएपछि न्यायाधीस अनिलकुमार सिन्हाले बिहीबार आफूले खोज्दा राजपत्र नभेटेको स्पष्ट पारेका छन् । न्यायाधीस सिन्हाले राजपत्रको कुरा उठेपछि आफुले पीएलाई खोज्न लगाएपनि अनालाइनमा समेत नभेटिएको बताए ।

अहिले मुद्दाको सुनुवाइ सुरु जारी छ । रिट निवेदकतर्फका कानुन व्यवसायी बहसमा छन् ।