काठमाडौं । प्रचण्ड–नेपाल पक्षीय नेपाल कम्युनिष्ट पार्टी (नेकपा) को स्थायी कमिटी बैठक आज बस्दैछ ।
मध्यान्ह १२ बजेपछि पेरिसडाँडामा बस्ने बैठकमा सरकार विरुद्ध जारी आन्दोलनको समीक्षा र पार्टी संगठनको विषयमा छलफल हुने एक नेताले बताए ।
शनिबार पनि पदाधिकारी र उपलब्ध स्थायी कमिटी सदस्यहरुबीच अनौपचारिक छलफल भएको थियो ।
छलफलमा शुक्रबार भएको काठमाडौंको जनप्रदशन पछि मञ्चमा देखिएको असहजताबारे छलफल भएको थियो । केन्द्रीय संघर्ष समितिले तय गरेविपरित मञ्चको व्यवस्थापन भएको भन्दै प्रवक्ता श्रेष्ठले मञ्चमै सबैले देख्ने गरी असन्तुष्टि प्रकट गरेका थिए । हिजोको अनौपचारिक बैठकमा स्थायी कमिटीका एजेन्डाबारे सामान्य छलफल भएको थियो।
गत पुष ५ गते प्रधानमन्त्री केपी शर्मा ओलीले प्रतिनिधिसभा विघटन गरेपछि नेकपा दुई समुहमा विभाजित भैसकेको छ । एक समुहको नेतृत्व प्रचण्ड र माधवकुमार नेपालल गरेका छन् भने अर्को समुहको नेतृत्व ओलीले गरेका छन् ।
दुवै समुहले एक अर्कालाई कारवाहीको प्रक्रिया अघि बढाएका छन् । प्रचण्ड नेपाल पक्षले प्रधानमन्त्री ओलीलाई अध्यक्ष पदबाट निस्काशन गरिसकसको छ । उनलाई पार्टीको साधारण सदस्यबाटै निस्काशन गर्नका लागि तीनदिने स्पष्टिकरण पनि सोधिएको छ । त्यसबारे पनि आजको स्थायी कमिटी बैठकमा छलफल हुने बताइएको छ ।
यसैगरी महासचिव लगायत पदाधिकारीको चयनको विषयमा प्रचण्ड र नेपालबीच अझै सहमति जुट्न सकेको छैन ।
प्रतिक्रिया